مستحق طلبہ کیلئے پاکستان بیت المال اسکالرشپ 2026 کا اعلان
اسکالرشپ کیلئے درخواستیں جمع کرانے کی آخری تاریخ 24 ستمبر 2026 مقرر کی گئی ہے۔
یونیورسٹی انتظامیہ کے مطابق پاکستان بیت المال اسکالرشپ کیلئے بی ایس کے پہلے، تیسرے، پانچویں اور ساتویں سمسٹر جبکہ ایم فل کے پہلے اور دوسرے سمسٹر کے ریگولر طلبہ درخواست دینے کے اہل ہوں گے۔
اسکالرشپ کی فراہمی میں یتیم، معذور اور انتہائی مستحق طلبہ کو ترجیح دی جائے گی، تاکہ مالی مشکلات کا سامنا کرنے والے طلبہ اپنی تعلیم کا سلسلہ جاری رکھ سکیں۔
قائداعظم یونیورسٹی کے مطابق ایسے طلبہ جن کے خاندانی پس منظر کی ماہانہ آمدن 45 ہزار روپے سے زائد ہے، وہ اس اسکالرشپ کیلئے اہل نہیں ہوں گے۔ اس کے علاوہ سیلف فنانس اسکیم کے تحت زیر تعلیم طلبہ بھی درخواست جمع نہیں کراسکیں گے۔
طلبہ اسکالرشپ کے درخواست فارم قائداعظم یونیورسٹی کی فوٹو کاپی شاپس سے حاصل کرسکتے ہیں، مکمل فارم مطلوبہ معلومات کے ساتھ آفس آف اسٹوڈنٹس فنانشل اسسٹنس میں جمع کرانا ہوگا۔
انتظامیہ کی جانب سے واضح کیا گیا کہ درخواست فارم میں غلط معلومات درج کرنے، کٹنگ یا اوور رائٹنگ کرنے کی صورت میں درخواست مسترد کردی جائے گی۔ مقررہ تاریخ کے بعد موصول ہونے والی درخواستیں بھی قابل قبول نہیں ہوں گی۔
یہ بھی پڑھیں:ڈرائیونگ لائسنس بنوانے کا طریقہ بدل گیا، اب کیا کرنا ہوگا؟
یونیورسٹی انتظامیہ نے اہل طلبہ کو ہدایت کی ہے کہ وہ آخری تاریخ کا انتظار کیے بغیر اپنے درخواست فارم مکمل کرکے مقررہ وقت کے اندر جمع کرائیں تاکہ اسکالرشپ کے لیے ان کی درخواست پر غور کیا جاسکے۔
