نئے صوبوں کے قیام پر ایم کیو ایم کا سڑکوں پر نکلنے کا اعلان
ایم کیو ایم پاکستان کے چیئرمین ڈاکٹر خالد مقبول صدیقی نے کہا ہے کہ ایوانوں اور سیاسی فورمز پر بات کرنے کے بعد اب سڑکوں پر اپنی طاقت دکھانے کا وقت آگیا ہے۔
خالد مقبول صدیقی نے ان خیالات کا اظہار نیو کراچی میں ایم کیو ایم پاکستان کے خواتین کنونشن سے خطاب کرتے ہوئے کیا۔
انہوں نے اعلان کیا کہ نئے صوبوں کے قیام کے مطالبے کے حوالے سے پہلے مرحلے میں ضلع وسطی کراچی میں احتجاج اور ریلی کا انعقاد کیا جائے گا۔
ان کا کہنا تھا کہ ایم کیو ایم نے پارلیمنٹ اور سیاسی فورمز پر اپنا مؤقف پیش کردیا ہے، اب اس مطالبے کو عوامی سطح پر اجاگر کرنے کیلئے سڑکوں پر نکلنے کا فیصلہ کیا گیا ہے۔
ایم کیو ایم پاکستان کے چیئرمین نے کہا کہ پاکستان کی تاریخ میں نئے صوبوں کا مطالبہ سب سے پہلے ایم کیو ایم نے اٹھایا تھا، تاہم یہ مطالبہ صرف کراچی تک محدود نہیں بلکہ ملک کے مختلف حصوں سے بھی نئے صوبوں کے قیام کی آوازیں بلند ہورہی ہیں۔
انہوں نے خواتین کارکنان کو پارٹی کی طاقت اور ہراول دستہ قرار دیتے ہوئے کہا کہ مشکل حالات کے باوجود ایم کیو ایم کا ساتھ نہ چھوڑنے والی خواتین نے ماضی میں بھی اہم کردار ادا کیا ہے، شہر میں جبر کے دور میں بھی ایم کیو ایم کی خواتین سب سے پہلے سڑکوں پر نکلی تھیں۔
یہ بھی پڑھیں:سہیل آفریدی کا علی امین گنڈا پور کو بڑا سیاسی جھٹکا
خالد مقبول صدیقی نے مزید کہا کہ آئندہ اتوار دن کے وقت کراچی کی سڑکوں پر ریلی نکالی جائے گی اور پہلے مرحلے میں ضلع وسطی میں احتجاج کیا جائے گا۔
انہوں نے سندھ میں علیحدگی کے نعروں کے حوالے سے بھی سخت مؤقف اختیار کرتے ہوئے کہا کہ جب تک ایک بھی مہاجر زندہ ہے، سندھودیش نہیں بن سکتا۔
