سستی ترین ائیر لائن کا کراچی سے مدینہ سفر کیلئے پروازوں کا آغاز
سعودیہ گروپ سے وابستہ کم لاگت والی ایئرلائن نے اتوار کے روز مدینہ سے کراچی کیلئے اپنی پہلی پرواز کے ذریعے نئے روٹ کا باقاعدہ افتتاح کیا، نئی سروس کے تحت مدینہ اور کراچی کے درمیان ہفتہ وار دو پروازیں چلائی جائیں گی۔
ایئرلائن کے مطابق اس روٹ پر 186 نشستوں سے لیس آل اکانومی کلاس ایئربس اے 320 نیو طیارے استعمال کیے جائیں گے۔ جدید طیارے میں مسافروں کی سہولت کو مدنظر رکھتے ہوئے مختلف جدید خصوصیات بھی شامل کی گئی ہیں۔
مسافروں کیلئے ہر سیٹ پر یو ایس بی اے اور یو ایس بی سی چارجنگ پورٹس فراہم کی گئی ہیں، جبکہ طیارے میں بڑے اوورہیڈ بنز اور موڈ لائٹنگ کی سہولت بھی موجود ہے، جس سے دورانِ سفر مسافروں کو مزید سہولت حاصل ہوگی۔
خیال رہہے کہ مدینہ ریاض کے بعد سعودی عرب کا دوسرا شہر بن گیا ہے جو کراچی کے ساتھ فلائی ڈیل کے بین الاقوامی نیٹ ورک کے ذریعے براہِ راست منسلک ہوگیا ہے۔
نئی فضائی سروس کے آغاز کے بعد فلائی ڈیل کا پاکستان میں نیٹ ورک سات روٹس تک پھیل گیا ہے۔ اس پیش رفت سے کراچی سے سعودی عرب جانے والے مسافروں، خصوصاً عمرہ اور دیگر سفری مقاصد رکھنے والوں کیلئے مزید سفری آپشنز دستیاب ہوں گے۔
یہ بھی پڑھیں:یوم فضائیہ آج ملی جوش و جذبے سے منایا جا رہا ہے
ایئرلائن کی جانب سے نئی سروس کو پاکستان اور سعودی عرب کے درمیان فضائی رابطوں کو وسعت دینے کی اہم پیش رفت قرار دیا جا رہا ہے۔
