یوم فضائیہ آج ملی جوش و جذبے سے منایا جا رہا ہے
اس موقع پر پاک فضائیہ کے ان شاہینوں کو خراجِ عقیدت پیش کیا جا رہا ہے جنہوں نے ملکی آزادی، خودمختاری اور سرحدوں کے دفاع کیلئے بے مثال قربانیاں دیں۔
یوم فضائیہ کے موقع پر 1965 کی جنگ کے دوران پاک فضائیہ کی شاندار کارکردگی اور قومی دفاع میں اس کے تاریخی کردار کو خصوصی طور پر یاد کیا جا رہا ہے۔
جنگ کے دوران پاک فضائیہ کے شاہینوں نے دشمن کے خلاف اپنی پیشہ ورانہ مہارت اور فضائی برتری کا بھرپور مظاہرہ کیا۔
اس موقع پر اسکواڈرن لیڈر ایم ایم عالم کا تاریخی کارنامہ بھی خصوصی اہمیت رکھتا ہے، ایم ایم عالم نے ایک ہی فضائی معرکے کے دوران دشمن کے متعدد جنگی طیارے مار گرائے۔ انہیں صرف 30 سیکنڈ میں چار بھارتی طیارے تباہ کرنے کے منفرد کارنامے کے حوالے سے یاد کیا جاتا ہے۔
دوسری جانب نشانِ حیدر پانے والے پائلٹ آفیسر راشد منہاس شہید کے مزار پر بھی پروقار تقریب منعقد ہوئی، جہاں انہیں خراجِ عقیدت پیش کیا گیا۔
مہمان خصوصی ایئر آفیسر کمانڈنگ سدرن ایئر کمانڈ، ایئر وائس مارشل اختر عمران سدوزئی نے راشد منہاس شہید کے مزار پر حاضری دی، فاتحہ خوانی کی اور پھولوں کی چادر چڑھائی۔
یہ بھی پڑھیں:قاتلانہ حملے میں بی اے پی رہنما عبدالرحمان لانگو جاں بحق
پاک فضائیہ کے چاق و چوبند دستے نے بھی راشد منہاس شہید کی لازوال قربانی کو سلام پیش کیا، ان کی بہادری اور وطن کے دفاع کیلئے دی گئی قربانی آج بھی قوم کیلئے مشعلِ راہ ہے۔
