56 روز بعد معروف کوہ پیما علی شاہ کی لاش کے ٹو سے برآمد
رپورٹس کے مطابق سید علی حیدر شاہ کی لاش کو ریسکیو ٹیم بیس کیمپ سے کالام منتقل کر رہی ہے، لاش کی منتقلی کیلئے ریسکیو ٹیم کو دشوار گزار پہاڑی راستوں اور سخت موسمی حالات کا سامنا کرنا پڑا۔
ریسکیو آپریشن پاک آرمی 6 بریگیڈ کے کمانڈر بریگیڈیئر عامر جمیل کی سربراہی میں کیا گیا، جس میں سکردو کے چاگوری گروپ اور مقامی کوہ پیماؤں نے بھی بھرپور حصہ لیا۔
سید علی حیدر شاہ 11 جولائی کو فلک سر منی K2 سمٹ مکمل کرنے کے بعد واپسی کے دوران حادثے کا شکار ہوگئے تھے۔
حادثے کے نتیجے میں وہ جاں بحق ہوگئے، تاہم دشوار گزار علاقے اور نامساعد موسمی حالات کے باعث ان کی لاش فوری طور پر برآمد نہیں کی جاسکی۔
متوفی کوہ پیما کی لاش کی تلاش اور ریکوری کیلئے اس سے قبل بھی دو مرتبہ ریسکیو آپریشن کیا گیا، تاہم دونوں کوششیں کامیاب نہ ہوسکیں۔
بالآخر تیسرے مرحلے میں پاک آرمی، مقامی کوہ پیماؤں اور سکردو کے چاگوری گروپ کی مشترکہ کوششوں سے 56 روز بعد سید علی حیدر شاہ کی لاش برآمد کرلی گئی۔
یہ بھی پڑھیں:پیٹرول چوری کی کوشش میں 37 افراد ہلاک،متعدد لاپتہ
ریسکیو آپریشن کی کامیابی پر متعلقہ ٹیموں کی کاوشوں کو سراہا جا رہا ہے، جبکہ واقعے نے کوہ پیمائی کے دوران پیش آنے والے خطرات اور دشوار گزار پہاڑی علاقوں میں ریسکیو کارروائیوں کی پیچیدگی کو بھی نمایاں کردیا ہے۔
