پی ٹی آئی کا کراچی میں پورٹیبل جلسہ کرنے کا اعلان
تفصیلات کے مطابق پاکستان تحریک انصاف (پی ٹی آئی) نے شاہراہ قائدین پر جلسے کی تاحال اجازت نہ ملنے کے بعد پلان بی پر عملدرآمد کی تیاری شروع کردی ہے۔ پارٹی کی جانب سے تیار کیے گئے خصوصی ٹرکس پر موبائل اسٹیج، ساؤنڈ سسٹم اور لائٹنگ کا انتظام ہوگا۔
پارٹی ذرائع کا کہنا ہے کہ مرکزی ٹرک پر وزیراعلیٰ خیبرپختونخوا سہیل آفریدی سمیت پارٹی کے دیگر قائدین موجود ہوں گے، جبکہ دیگر ٹرکس پر بھی جلسے سے متعلق ضروری انتظامات مکمل کیے جائیں گے۔
پورٹیبل جلسے کے تحت ٹرک جہاں رکے گا، وہیں عارضی اسٹیج قائم کرکے پارٹی رہنماؤں کے خطاب کا انتظام کیا جائے گا۔ اس طرح اجازت نہ ملنے کی صورت میں بھی پاکستان تحریک انصاف (پی ٹی آئی) اپنی سیاسی سرگرمی جاری رکھنے کا ارادہ رکھتی ہے۔
رپورٹس کے مطابق وزیراعلیٰ خیبرپختونخوا سہیل آفریدی کا مرکزی خطاب شاہراہ قائدین پر ہی متوقع ہے، تاہم اگر جلسے کی اجازت نہ ملی تو وہ ریلی کی شکل میں شہر کے مختلف علاقوں کا دورہ بھی کرسکتے ہیں۔
یہ بھی پڑھیں:میرپورخاص میں کل پنک سکوٹیز تقسیم ہوں گی، شرجیل میمن
واضح رہے کہ پاکستان تحریک انصاف (پی ٹی آئی) نے 6 ستمبر کو شاہراہ قائدین پر جلسے کا اعلان کر رکھا ہے، جلسے کی اجازت کیلئے پاکستان تحریک انصاف (پی ٹی آئی) کراچی کے صدر فہیم خان کی جانب سے متعلقہ حکام کو درخواست بھی جمع کرائی جاچکی ہے۔
