میرپورخاص میں کل پنک سکوٹیز تقسیم ہوں گی، شرجیل میمن
شرجیل میمن کی زیر صدارت اجلاس ہوا جس میں صوبے میں پیپلز بس سروس کی توسیع، ڈبل ڈیکر بسز، الیکٹرک وہیکل (ای وی) ٹیکسی سروس، پنک سکوٹیز اور بی آر ٹی منصوبوں سمیت مختلف سفری منصوبوں پر تفصیلی غور کیا گیا۔
اجلاس کو بریفنگ میں بتایا گیا کہ قمبر شہدادکوٹ سے لاڑکانہ روٹ پر پیپلز بس سروس جلد شروع کی جارہی ہے۔ اس کے علاوہ ڈبل ڈیکر بسوں کی آمد اور آپریشنل معاملات کو بھی حتمی شکل دی جارہی ہے۔
بریفنگ میں ای وی ٹیکسی سروس کے آپریشنل ماڈل اور سروس کے آغاز کیلئے کیے جانے والے اقدامات پر بھی تفصیلی گفتگو کی گئی۔ شرجیل میمن نے ہدایت کی کہ نئے روٹس پر بس سروس شروع کرنے کیلئے تمام انتظامات بروقت مکمل کیے جائیں۔
صوبائی وزیر نے کہا کہ پیپلز بس سروس کا دائرہ کار بڑھانے کا مقصد شہریوں کو بہتر اور مؤثر ٹرانسپورٹ سہولیات فراہم کرنا ہے۔
یہ بھی پڑھیں: 25 سالہ ٹک ٹاکر ارشمہ کی فلیٹ سے لاش برآمد
شرجیل انعام میمن نے متعلقہ اداروں کو بی آر ٹی منصوبوں پر کام کی رفتار مزید تیز کرنے کی ہدایت بھی کی۔ انہوں نے کہا کہ منصوبوں میں غیر ضروری تاخیر سے بچنے کیلئے تمام متعلقہ ادارے باہمی رابطے کے ساتھ کام کریں۔
انہوں نے واضح کیا کہ سندھ میں جدید سفری سہولیات کے منصوبوں کو تیزی سے آگے بڑھایا جائے گا تاکہ شہریوں کو آمدورفت کی بہتر سہولت میسر آسکے۔
