استعفیٰ دینا پڑے یا جانیں، سندھ پر کوئی سمجھوتہ نہیں ہوگا: فریال تالپور
سندھ اسمبلی میں انتظامی یونٹس اور سندھ کی تقسیم کیخلاف تحریک التوا پر اظہار خیال کرتے ہوئے فریال تالپور نے جذباتی تقریر کی۔
ان کا کہنا تھا کہ وہ سندھ کے ساتھ کھڑی ہیں اور آئندہ بھی کھڑی رہیں گی، سندھ کی تقسیم کے معاملے پر کسی قسم کا سمجھوتہ نہیں کیا جائے گا، سندھ صرف ایک خطہ نہیں بلکہ یہاں کے عوام، سندھیوں اور تمام آباد لوگوں کی دھرتی ہے، سب کا فیصلہ واضح ہے کہ سندھ کی وحدت کے معاملے پر نہ کوئی سمجھوتہ ہوگا اور نہ ہی اس حوالے سے کوئی بات کی جائے گی۔
انہوں نے کہا کہ پاکستان کھپے کے بعد اب ہمارا نعرہ سندھ کھپے ہے، ہم بیرون ملک نہیں بھاگیں گے، ہمارے بڑوں کی قبریں اسی سرزمین پر ہیں اور مرنے کے بعد ہمیں بھی یہیں دفن ہونا ہے۔
پیپلزپارٹی رہنما نے جذباتی انداز میں کہا کہ اگر قیامت کے روز بے نظیر بھٹو ان سے سوال کریں کہ وہ اور ان کے والد سندھ کیلئے جانیں دے کر گئے تھے اور تم نے سندھ کو بیچ دیا تو وہ اس سوال کا کیا جواب دیں گی۔
فریال تالپور نے اپنے خاندان کی تاریخ کا حوالہ دیتے ہوئے کہا کہ تالپوروں نے جنگیں اور لڑائیاں لڑی ہیں۔ میرپور کے میر شیر محمد تالپور کو سندھ کا شیر کہا جاتا تھا، جو ان کے شوہر کے دادا تھے اور سندھ کیلئے لڑتے رہے۔
یہ بھی پڑھیں:لاہور ہائیکورٹ کے جسٹس محمد راحیل کامران شیخ مستعفی
بلدیاتی نظام کے حوالے سے فریال تالپور کا کہنا تھا کہ سندھ میں مضبوط اور اچھا بلدیاتی نظام موجود ہے، تاہم اس میں مزید بہتری کیلئے بات ہوسکتی ہے۔
