سندھ میں الیکٹرک گاڑیوں پر ٹیکس مراعات میں 2 سال کی توسیع
وزیراعلی سندھ سید مراد علی شاہ کی زیر صدارت وزیر اعلیٰ ہاؤس میں کابینہ کا اجلاس ہوا، جس میں الیکٹرک گاڑیوں کے استعمال کی حوصلہ افزائی کیلئے اہم فیصلے کیے گئے ہیں۔
کابینہ نے الیکٹرک گاڑیوں کی رجسٹریشن اور ٹیکس میں رعایت کا پیکج منظور کرتے ہوئے مراعات کی مدت 29 مئی 2028 تک بڑھا دی ہے۔
فیصلے کے مطابق الیکٹرک گاڑی کی رجسٹریشن فیس 1 ہزار روپے برقرار رہے گی جبکہ غیر تجارتی الیکٹرک گاڑیوں پر سالانہ موٹر وہیکل ٹیکس 500 روپے ہوگا۔
الیکٹرک موٹر سائیکلوں پر 500 روپے ایک مرتبہ تاحیات موٹر وہیکل ٹیکس عائد ہوگا۔
کابینہ کے مطابق 2000 سی سی یا اس سے زائد مساوی انجن کی حامل الیکٹرک گاڑیوں پر 5 ہزار روپے لگژری ٹیکس ہوگا جبکہ گاڑی کی تاخیر سے رجسٹریشن پر 1 ہزار روپے جرمانہ مقرر کیا گیا ہے۔
یہ مراعات 30 مئی 2026 سے 29 مئی 2028 تک نافذ رہیں گی۔
یہ بھی پڑھیں: وزیراعظم شہباز شریف کی ورلڈ نومیڈ گیمز کی افتتاحی تقریب میں شرکت
وزیر اعلیٰ سندھ نے کہا کہ الیکٹرک گاڑیوں کے فروغ سے درآمدی ایندھن پر انحصار کم کرنے کے ساتھ کاربن کے اخراج اور شہری فضائی آلودگی میں کمی لانے میں مدد ملے گی۔
سید مراد علی شاہ کے مطابق ٹیکس مراعات کے تسلسل سے صوبے میں الیکٹرک گاڑیوں کے استعمال اور الیکٹرک موبیلٹی کے شعبے میں سرمایہ کاری کو فروغ ملے گا۔
