سیلاب متاثرین کیلئے نئے گھر، حکومت نے خوشخبری سنا دی
وزیراعلیٰ کو محکمہ پلاننگ اینڈ ڈویلپمنٹ کی جانب سے ڈونرز کے تعاون سے شروع کیے جانے والے 16 ارب روپے مالیت کے کلائمیٹ ریزیلینس پروجیکٹ کے حوالے سے تفصیلی بریفنگ دی گئی۔
منصوبے کے تحت گلگت بلتستان میں قدرتی آفات کے خطرات سے نمٹنے اور عوام کو بنیادی سہولیات کی فراہمی کیلئے مختلف اقدامات کیے جائیں گے۔
بریفنگ میں بتایا گیا کہ منصوبے کے تحت ماحول دوست اور محفوظ تعمیرات کو فروغ دینے کے علاوہ صاف پانی کی فراہمی، سیوریج سسٹم کی بہتری اور آسان شرائط پر قرضوں کی فراہمی سمیت متعدد منصوبے شروع کیے جائیں گے۔
اس منصوبے کا مقصد موسمیاتی تبدیلی اور قدرتی آفات سے متاثرہ علاقوں میں عوام کی مشکلات کم کرنا اور مستقبل میں نقصانات کے خطرات کو محدود کرنا ہے۔
اس موقع پر گفتگو کرتے ہوئے وزیراعلیٰ امجد حسین ایڈووکیٹ نے کہا کہ گلگت بلتستان قدرتی آفات کے حوالے سے انتہائی حساس خطہ ہے، جہاں ہر سال کلاؤڈ برسٹ، سیلاب اور دیگر قدرتی حادثات کے باعث بڑی تعداد میں گھر تباہ ہوجاتے ہیں اور شہریوں کو مشکلات کا سامنا کرنا پڑتا ہے۔
انہوں نے کہا کہ صوبائی حکومت نے فیصلہ کیا ہے کہ قدرتی آفات کے نتیجے میں تباہ ہونے والے شہریوں کے مکانات کی جگہ ایسے محفوظ گھروں کی تعمیر کی جائے گی جو مستقبل میں قدرتی آفات کے اثرات سے بہتر طور پر محفوظ رہ سکیں۔
وزیراعلیٰ نے بتایا کہ وفاقی حکومت کے تعاون سے گزشتہ سال بوبَر کے سیلاب متاثرین کیلئے ایک کالونی قائم کی گئی تھی، جبکہ رواں سال سندھ حکومت کے تعاون سے قدرتی آفات سے متاثرہ افراد کیلئے 200 گھر تعمیر کیے جا رہے ہیں۔
امجد حسین ایڈووکیٹ نے کہا کہ متاثرین کی بحالی صرف گھروں کی تعمیر تک محدود نہیں ہونی چاہیے بلکہ انہیں بنیادی سہولیات، محفوظ رہائش اور معاشی مواقع بھی فراہم کرنا ضروری ہیں۔ انہوں نے متعلقہ حکام کو ہدایت کی کہ کلائمیٹ ریزیلینس پروجیکٹ میں قدرتی آفات سے متاثرہ افراد کیلئے محفوظ گھروں کی تعمیر کو بھی باقاعدہ طور پر شامل کیا جائے۔
وزیراعلیٰ نے آفت زدہ علاقوں میں تباہ ہونے والے گھروں کی تعمیر و بحالی کیلئے بھی فوری اقدامات کی ہدایت کی اور کہا کہ اس سلسلے میں باضابطہ منظوری متعلقہ اسٹیئرنگ کمیٹی سے حاصل کی جائے۔
انہوں نے منصوبے پر شفاف اور مؤثر عملدرآمد یقینی بنانے کیلئے پروجیکٹ ڈائریکٹر کی تعیناتی میں میرٹ کو ہر صورت یقینی بنانے کی ہدایت بھی کی۔
یہ بھی پڑھیں:نادرا نے نیا کیو آر کوڈ شناختی کارڈ متعارف کرا دیا
ان کا کہنا تھا کہ مختلف متعلقہ شعبوں کے ماہرین کو شفاف انٹرویو کے ذریعے موقع دیا جائے تاکہ اہل اور قابل امیدوار کا انتخاب ممکن ہوسکے۔
وزیراعلیٰ نے مزید کہا کہ کلائمیٹ ریزیلینس پروجیکٹ گلگت بلتستان میں بنیادی سہولیات کی فراہمی کے ساتھ ساتھ معاشی سرگرمیوں کے فروغ اور موسمیاتی خطرات سے نمٹنے کیلئے بھی اہم کردار ادا کرے گا۔
