پیٹرول سستا، ڈیزل مہنگا، نئی قیمتوں کا اعلان
پیٹرولیم ڈویژن کی جانب سے نئی قیمتوں کا نوٹیفکیشن جاری کردیا گیا، جس کے مطابق نئی قیمتوں کا اطلاق 13 اگست سے ہوگا۔
نوٹیفکیشن کے مطابق پیٹرول کی قیمت میں 94 پیسے فی لیٹر کمی کی گئی، جس کے بعد پیٹرول کی نئی قیمت 324 روپے 98 پیسے فی لیٹر مقرر کردی گئی ہے۔
دوسری جانب ہائی اسپیڈ ڈیزل کی قیمت میں 54 پیسے فی لیٹر اضافہ کردیا گیا، جس کے بعد ڈیزل کی نئی قیمت 382 روپے 79 پیسے فی لیٹر ہوگئی ہے۔
حکومت کی جانب سے مٹی کے تیل کی قیمت میں بھی کمی کی گئی، اوگرا کے نوٹیفکیشن کے مطابق مٹی کا تیل 41 پیسے فی لیٹر سستا کیا گیا، جس کے بعد اس کی نئی قیمت 289 روپے 27 پیسے فی لیٹر مقرر کی گئی ہے۔
نوٹیفکیشن کے مطابق پیٹرولیم مصنوعات کی نئی قیمتوں کا اطلاق 13 اگست کی رات 12 بجے سے ہوگا۔
یاد رہے کہ گزشتہ روز بھی پیٹرول کی قیمت میں 1 روپے 70 پیسے فی لیٹر کمی جبکہ ڈیزل کی قیمت میں 1 روپے 39 پیسے فی لیٹر اضافہ کیا گیا تھا۔
ڈیزل پر لیوی میں اضافہ
اوگرا کے مطابق حکومت نے ڈیزل پر پیٹرولیم لیوی میں بھی 1 روپے فی لیٹر اضافہ کردیا ہے، جس کے بعد ڈیزل پر لیوی 77 روپے 28 پیسے فی لیٹر ہوگئی ہے۔
یہ بھی پڑھیں:عمران خان کا اکبر ایس بابر کے نام جیل سے اہم پیغام
پیٹرول پر پیٹرولیم لیوی 80 روپے فی لیٹر جبکہ مٹی کے تیل پر لیوی 20 روپے 36 پیسے فی لیٹر برقرار رکھی گئی ہے۔
حالیہ ردوبدل کے بعد پیٹرول صارفین کو معمولی ریلیف ملے گا، تاہم ڈیزل کی قیمت میں اضافے کے باعث ٹرانسپورٹ اور دیگر شعبوں کے اخراجات پر اثر پڑنے کا امکان ہے۔
