کراچی میں نوزائیدہ بچے کی لاش رہائشی عمارت سے برآمد
کراچی کے علاقے گلشن اقبال بلاک 13 ڈی ٹو میں قائم ایک رہائشی عمارت سے نوزائیدہ بچے کی لاش ملنے پر پولیس اور امدادی اداروں کے رضاکار موقع پر پہنچ گئے۔
پولیس کے مطابق لاش رہائشی عمارت کے ٹاور ون کے ڈک سے برآمد ہوئی، ایس ایچ او گلشن اقبال نے بتایا کہ ابتدائی تحقیقات میں شبہ ظاہر کیا جارہا ہے کہ نوزائیدہ بچے کی لاش ڈک کے ذریعے عمارت سے نیچے پھینکی گئی ہے۔
پولیس کے مطابق ابتدائی طور پر نو زائیدہ بچے کی لاش 2 سے 3 روز پرانی معلوم ہوتی ہے، تاہم واقعے کی اطلاع ملنے کے بعد پولیس نے جائے وقوعہ کا معائنہ کیا اور ضروری شواہد اکٹھے کیے، حکام کا کہنا ہے کہ لاش کی موجودگی اور اسے عمارت کی ڈک تک پہنچانے جانے کے متعلق مختلف پہلوؤں سے تحقیقات کی جا رہی ہے۔
یہ بھی پڑھیں: بس میں موبائل چوری، ڈرائیور نے پوری بس تھانے پہنچا دی
پولیس نے جائے وقوعہ سے شواہد حاصل کرنے کے بعد قانونی کارروائی مکمل کی اور بعد ازاں بچے کی لاش ایدھی رضاکاروں کے حوالے کر دی گئی ہے۔
پولیس کا کہنا ہے کہ واقعے میں ملوث افراد کا تعین کرنے کیلئے مزید چھان بین جاری ہے۔
