سائیڈ ویو مررز اور انڈیکیٹرز کے بغیر سفر پر اب جرمانہ ہوگا
حکام کے مطابق خلاف ورزی کرنے والے موٹرسائیکل سواروں پر جرمانے عائد کیے جائیں گے تاکہ سڑکوں پر حادثات کی شرح میں کمی لائی جا سکے۔
سٹی ٹریفک پولیس لاہور کی جانب سے جاری بیان میں کہا گیا کہ سائیڈ ویو مررز اور انڈیکیٹرز موٹرسائیکل کے بنیادی حفاظتی آلات ہیں، جن کا استعمال نہ صرف ٹریفک قوانین کا تقاضا ہے بلکہ ڈرائیور اور دیگر شہریوں کی حفاظت کیلئے بھی انتہائی ضروری ہے۔
پولیس حکام کے مطابق پنجاب بھر میں اس مہم کے دوران خلاف ورزی کرنے والوں کیخلاف قانونی کارروائی کی جائے گی، جبکہ شہریوں میں ٹریفک قوانین سے متعلق شعور اجاگر کرنے کیلئے آگاہی مہم اور ڈرائیور ایجوکیشن سیشنز بھی منعقد کیے جائیں گے۔
بیان میں مزید کہا گیا کہ سائیڈ ویو مررز اور انڈیکیٹرز کے بغیر موٹرسائیکل چلانے سے حادثات کے امکانات بڑھ جاتے ہیں، کیونکہ ڈرائیور کو عقب سے آنے والی ٹریفک کا درست اندازہ نہیں ہو پاتا اور موڑ کاٹتے یا لین تبدیل کرتے وقت دیگر گاڑیوں کو بروقت اشارہ بھی نہیں ملتا۔
یہ بھی پڑھیں:حکومت نے پیٹرول اور ڈیزل سستا کر دیا، نوٹیفکیشن جاری
ٹریفک پولیس نے تمام موٹرسائیکل سواروں سے اپیل کی ہے کہ وہ اپنی گاڑیوں کو مکمل حفاظتی تقاضوں کے مطابق رکھیں، سائیڈ ویو مررز اور انڈیکیٹرز کو درست حالت میں استعمال کریں اور ٹریفک قوانین کی پابندی کریں۔
