سپریم کورٹ: عمران خان کی ہسپتال منتقلی کی درخواست پراپیل منظور
چیف جسٹس یحییٰ آفریدی نے درخواست پر ابتدائی سماعت کے دوران اہم احکامات جاری کرتے ہوئے کیس کو باقاعدہ سماعت کیلئے آگے بڑھانے کی ہدایت کر دی۔
چیف جسٹس یحییٰ آفریدی نے بانی پی ٹی آئی کی جانب سے دائر چیمبر اپیل کی سماعت چیمبر میں کی، جس میں ان کے وکیل عذیر کرامت بھنڈاری عدالت کے روبرو پیش ہوئے، دلائل سننے کے بعد عدالت نے رجسٹرار سپریم کورٹ کے اعتراضات مسترد کرتے ہوئے اپیل منظور کر لی۔
سماعت کے دوران چیف جسٹس نے وکیل عذیر کرامت بھنڈاری کو دستخط شدہ وکالت نامہ جمع کرانے کی ہدایت بھی جاری کی۔ عدالت نے رجسٹرار آفس کو حکم دیا کہ بانی پی ٹی آئی کی ہسپتال منتقلی سے متعلق اپیل کو باقاعدہ نمبر الاٹ کیا جائے تاکہ اس پر آئندہ کارروائی قانون کے مطابق آگے بڑھائی جا سکے۔
عدالت عظمیٰ نے مزید ہدایت کی کہ عمران خان کی درخواست کو عظمیٰ خان کے زیر سماعت کیس کے ساتھ منسلک کیا جائے۔ اس کے ساتھ ہی بانی پی ٹی آئی اور عظمیٰ خان کی درخواستوں کو جلد سماعت کیلئے مقرر کرنے کی استدعا بھی منظور کر لی گئی۔
یہ بھی پڑھیں:جب تک نئی قیادت نہیں آئے گی، کام نہیں ہوگا: محسن نقوی
واضح رہے کہ سپریم کورٹ کے اس فیصلے کے بعد عمران خان کی ہسپتال منتقلی سے متعلق درخواست اب باقاعدہ عدالتی کارروائی کا حصہ بن جائے گی، جہاں عدالت درخواست کے قانونی اور آئینی پہلوؤں کا جائزہ لے گی۔
