میٹرو بس، اورنج ٹرین، اسپیڈو میں ٹوکن اور کارڈ سسٹم ختم
ماس ٹرانزٹ اتھارٹی کے انچارج عزیر شاہ نے اپنے بیان میں کہا کہ پرانے ٹوکن اور کارڈ اب قابلِ استعمال نہیں ہوں گے، ان کی جگہ مسافر ٹی کیش (T-Cash) کارڈ، موبائل ایپ اور اے ٹی ایم/بینک کارڈ کے ذریعے کرایہ ادا کر سکیں گے، جس کا مقصد عوام کو زیادہ آسان، تیز اور جدید سفری سہولت فراہم کرنا ہے۔
انہوں نے بتایا کہ جن مسافروں کے پاس پرانے کارڈ موجود ہیں، وہ انہیں متعلقہ اسٹیشن پر جمع کروائیں، کارڈ میں موجود بیلنس واپس نہیں کیا جائے گا، تاہم کارڈ کی سکیورٹی رقم کے طور پر 130 روپے واپس کیے جائیں گے۔
دوسری جانب متعدد مسافروں نے ماس ٹرانزٹ اتھارٹی کے فیصلے پر تحفظات کا اظہار کرتے ہوئے کہا کہ کارڈ سسٹم ختم کرنے کے باوجود بعض مقامات پر اب بھی پرانے کارڈ ری چارج کیے جا رہے ہیں، جبکہ انہیں اس تبدیلی کے بارے میں پیشگی اطلاع بھی نہیں دی گئی۔
مسافروں کا مطالبہ ہے کہ اتھارٹی اس حوالے سے واضح اور جامع آگاہی مہم چلائے تاکہ عوام کو کسی قسم کی پریشانی کا سامنا نہ کرنا پڑے۔
یہ بھی پڑھیں:عید میلاد النبی ﷺ پر تین روزہ تعطیلات کا امکان
شہریوں کا کہنا ہے کہ اگرچہ ڈیجیٹل ادائیگی کا نظام خوش آئند اقدام ہے، لیکن پرانے کارڈز میں موجود بیلنس واپس نہ کرنے کا فیصلہ صارفین کیلئے مایوس کن ہے۔
انہوں نے مطالبہ کیا کہ ماس ٹرانزٹ اتھارٹی اس معاملے پر نظرثانی کرے اور متاثرہ مسافروں کو مناسب ریلیف فراہم کرے تاکہ نئے نظام پر منتقلی مزید آسان اور شفاف بنائی جا سکے۔
