سابق امیر قطر کا انتقال، پاکستان میں کل یوم سوگ منایا جائیگا
کابینہ ڈویژن نے 13 جولائی کو قومی یومِ سوگ کے حوالے سے نوٹیفکیشن جاری کر دیا۔
نوٹیفکیشن کے مطابق حکومتِ پاکستان نے 13 جولائی کو قومی یومِ سوگ قرار دے دیا، قومی یومِ سوگ کے موقع پر ملک بھر میں قومی پرچم سرنگوں رہے گا۔
وزیر اعظم شہباز شریف کی جانب سے قطر کے سابق امیر کے انتقال پر یومِ سوگ کا اعلان کیا گیا،پاکستان کی جانب سے قطر کی حکومت، شاہی خاندان اور عوام سے یکجہتی کا اظہار بھی کیا گیا۔
واضح رہے کہ سابق امیر قطر شیخ حمد بن خلیفہ الثانی آج اتوار کے روز 74 برس کی عمر میں انتقال کر گئے۔
شیخ حمد بن خلیفہ الثانی نے 1995 سے 2013 تک قطر کے امیر کی حیثیت سے خدمات انجام دیں، ان کے دورِ اقتدار میں قطر نے معاشی، سفارتی اور عالمی سطح پر نمایاں ترقی کی اور دنیا کے امیر ترین ممالک میں شامل ہوا۔
یہ بھی پڑھیں: قطر کے سابق امیر شیخ حمد بن خلیفہ الثانی خالقِ حقیقی سے جا ملے
پاکستان کے نائب وزیراعظم اور وزیر خارجہ اسحاق ڈار نے شیخ حمد بن خلیفہ الثانی کے انتقال پر گہرے دکھ اور افسوس کا اظہار کرتے ہوئے کہا کہ شیخ حمد بن خلیفہ نے پاکستان اور قطر کے درمیان دوستانہ تعلقات کے فروغ میں اہم کردار ادا کیا۔
اسحاق ڈار کا کہنا تھا کہ سابق قطری امیر کی خطے میں امن، استحکام اور ترقی کیلئے خدمات کو ہمیشہ یاد رکھا جائے گا، مرحوم کے اہلِ خانہ اور قطری عوام سے تعزیت کا اظہار بھی کیا۔
