پاکستان کا خطے میں بڑھتی ہوئی کشیدگی پر گہری تشویش کا اظہار
دفتر خارجہ کی جانب سے جاری ایک بیان میں کہا گیا کہ خطے کے تمام برادر ممالک کی خودمختاری اور علاقائی سالمیت کے لیے اپنی مضبوط حمایت کا اعادہ کرتے ہیں، تمام فریقین تحمل کا مظاہرہ کریں۔
ترجمان نے کہا کہ فریقین کشیدگی میں فوری کمی کے لیے عملی اقدامات کریں، اسلام آباد مفاہمتی یادداشت (ایم او یو) کے تحت کیے گئے اپنے اپنے وعدوں کی پاسداری کریں۔
دفتر خارجہ کی جانب سے کہا گیا کہ خطے میں پائیدار امن اور استحکام کے لیے مذاکرات اور سفارتکاری کے ذریعے ہر ممکن تعاون جاری رکھیں گے، دیرپا امن کا واحد راستہ مذاکرات، سفارت کاری اور تحمل ہے۔
دوسری جانب او آئی سی نے بحرین، کویت، یو اے ای، قطر، عمان اور اردن پر حملوں کی شدید الفاظ میں مذمت کی ہے۔
یہ بھی پڑھیں: ایران کا اُردن میں امریکی فوجی اڈے کو تباہ کرنے کا دعویٰ
او آئی سی کی جانب سے کہا گیا کہ حملے متعلقہ ممالک کی خودمختاری اور علاقائی سالمیت کی کھلی خلاف ورزی ہیں، ایران کی کارروائیاں بین الاقوامی قانون اور اقوام متحدہ کے منشور سے متصادم ہیں۔
اسلامی تعاون تنظیم نے خطے میں امن و استحکام کے لیے کشیدگی کم کرنے پر زور دیتے ہوئے بحرین، کویت، یو اے ای، قطر، عمان اور اردن سے مکمل یکجہتی کا اظہار اور حمایت کا اعادہ بھی کیا۔
