شارجہ سے کراچی آنے والا کارگو طیارہ سمندر میں گر کر تباہ
ترجمان پاکستان ائیر پورٹ اتھارٹی کے مطابق نجی کارگو طیارہ معمول کے مطابق شارجہ سے کراچی آرہا تھا کہ دورانِ پرواز اس کا فضائی کنٹرول سے رابطہ منقطع ہوگیا۔
طیارے کے پائلٹ نے رابطہ ختم ہونے سے قبل نیویگیشن سسٹم میں خرابی کی اطلاع دی تھی، جس پر کراچی ایئر ٹریفک کنٹرول سینٹر (ACC) نے فوری طور پر رہنمائی فراہم کی۔
ترجمان کے مطابق ابتدائی معلومات سے معلوم ہوا ہے کہ طیارہ اچانک تیزی سے نیچے آیا اور اس نے اپنی سمت بھی تبدیل کر لی، کچھ ہی لمحوں بعد کراچی سے تقریباً 155 ناٹیکل میل مغرب میں طیارہ ریڈار سے غائب ہوگیا، جبکہ ریڈار اور مواصلاتی رابطہ بیک وقت منقطع ہوگیا، جس سے کسی بڑے حادثے کے خدشات پیدا ہوگئے۔
واقعے کے فوراً بعد ریسکیو کوآرڈینیشن سینٹر کو فعال کر دیا گیا اور بحیرۂ عرب میں سرچ اینڈ ریسکیو آپریشن کا آغاز کر دیا گیا۔ حکام کے مطابق مختلف متعلقہ ادارے، جن میں بحری اور فضائی ریسکیو ٹیمیں شامل ہیں، لاپتا طیارے اور اس میں سوار افراد کی تلاش میں مصروف ہیں۔
یہ بھی پڑھیں:نشتر کالونی کے علاقے میں ورکشاپ کی چھت گر گئی، 4 افراد زخمی
پاکستان ائیر پورٹ اتھارٹی کے مطابق نجی کارگو طیارے میں عملے کے پانچ افراد سوار تھے، تاہم ان کی حالت یا کسی ممکنہ جانی نقصان کے بارے میں فی الحال کوئی سرکاری تصدیق سامنے نہیں آئی۔
حکام کا کہنا ہے کہ سرچ آپریشن جاری ہے اور طیارے کے حادثے کی وجوہات کا تعین تحقیقات مکمل ہونے کے بعد کیا جائے گا، مزید پیش رفت سامنے آنے پر عوام کو باقاعدگی سے آگاہ کیا جائے گا۔
