لاہور: نشتر کالونی کے علاقے میں ورکشاپ کی چھت گر گئی، 4 افراد زخمی
ریسکیو حکام کے مطابق ورکشاپ کی چھت لکڑی سے بنی ہوئی تھی جس پر مٹی بھی ڈالی گئی تھی، چھت کمزور ہونے کے باعث اچانک زمین بوس ہو گئی، جس کے نتیجے میں وہاں موجود چار افراد ملبے تلے دب کر زخمی ہو گئے۔
حادثے کی اطلاع ملتے ہی ریسکیو ٹیمیں موقع پر پہنچ گئیں اور فوری امدادی کارروائیاں شروع کر دیں، ریسکیو اہلکاروں نے ملبے سے زخمی افراد کو نکال کر ابتدائی طبی امداد فراہم کی، جس کے بعد انہیں اسپتال منتقل کر دیا گیا۔
ریسکیو حکام کا کہنا ہے کہ زخمیوں کی حالت خطرے سے باہر ہے اور اسپتال میں ان کا علاج جاری ہے، حکام کے مطابق ابتدائی طور پر حادثہ چھت کی خستہ حالی اور اضافی وزن کے باعث پیش آیا۔
واقعے کے بعد علاقے میں خوف و ہراس پھیل گیا، جبکہ مقامی افراد کا کہنا ہے کہ پرانی اور کمزور عمارتوں کی بروقت مرمت نہ ہونے کے باعث ایسے حادثات کا خطرہ بڑھ جاتا ہے۔
یہ بھی پڑھیں: کاہنہ میں ٹیوشن سنٹر کی چھت گرنے سے 14 بچے جاں بحق
دوسری جانب لاہور کے ہی علاقے آشیانہ روڈ اعظم چوک کے قریب گھر کی چھت گرگئی، چھت گرنے کے اس واقعے میں دو افراد زخمی ہوئے جنہیں موقع پر ابتدائی طبی امداد فراہم کی گئی۔
ریسکیو حکام نے بتایا کہ تمام افراد کو نکال لیا گیا ہے، چھت گرنے کے اس واقع میں زخمی افراد کی شناخت شبیر بعمر 45 سال اور ذوالقرنین بعمر 15 سال سے ہوئی ہے۔
