آزاد کشمیر: وزیر زراعت علی شان سونی عہدے سے برطرف
جاری کردہ نوٹیفکیشن کے مطابق وزیراعظم آزاد کشمیر فیصل راٹھور نے اپنے آئینی اختیارات استعمال کرتے ہوئے علی شان سونی کی برطرفی کی منظوری دی۔
وزیراعظم آزاد کشمیر کی منظوری کے بعد علی شان سونی وزارتِ زراعت، مویشی بانی، آبپاشی، ڈیری ڈویلپمنٹ اور سمال ڈیمز کے قلمدان سے سبکدوش ہو گئے۔
کابینہ ڈویژن کی جانب سے جاری نوٹیفکیشن میں کہا گیا ہے کہ یہ کارروائی آئینِ عبوری 1974 کے آرٹیکل 14 کی شق 3 کے تحت عمل میں لائی گئی ہے، نوٹیفکیشن کے اجرا کے بعد متعلقہ اداروں کو بھی علی شان سونی کی برطرفی سے متعلق آگاہ کر دیا گیا۔
ذرائع کے مطابق علی شان سونی آزاد کشمیر کابینہ میں اہم وزارتوں کے قلمدان سنبھالے ہوئے تھے تاہم حالیہ سیاسی صورتحال کے بعد ان کی وزارت سے برطرفی کا فیصلہ کیا گیا۔
واضح رہے کہ علی شان سونی وزارت میں رہتے ہوئے پاکستان پیپلز پارٹی سے علیحدگی اختیار کر تے ہوئے استحکام پاکستان پارٹی میں شمولیت اختیار کر لی تھی۔
یہ بھی پڑھیں: سیاسی و معاشی بحران کا حل مذاکرات میں ہے، رانا ثناء اللہ
ذرائع کا کہنا ہے کہ انہوں نے آزاد کشمیر انتخابات کے لیے پیپلز پارٹی کی مرکزی قیادت کے پاس اپنے کاغذاتِ نامزدگی بھی جمع نہیں کرائے تھے جس کے بعد ان کے سیاسی مستقبل سے متعلق مختلف قیاس آرائیاں جاری تھیں۔
علی شان سونی کی برطرفی کو آزاد کشمیر کی سیاست میں اہم پیش رفت قرار دیا جا رہا ہے، سیاسی حلقوں کے مطابق اس فیصلے کے بعد آزاد کشمیر کابینہ میں مزید تبدیلیاں بھی متوقع ہیں تاہم حکومت کی جانب سے فی الحال کسی نئی تعیناتی کا اعلان نہیں کیا گیا۔
