باغبانپورہ میں ٹیوشن سینٹر کا لینٹر گرگیا، بچہ جاں بحق
واقعے کے بعد ریسکیو ٹیموں نے امدادی کارروائیاں شروع کرتے ہوئے زخمیوں کو سروسز ہسپتال منتقل کر دیا۔
ایم ایس سروسز ہسپتال کے مطابق ایک بچے کو مردہ حالت میں ہسپتال لایا گیا، جبکہ چار زخمی زیر علاج ہیں۔ زخمیوں میں 35 سالہ ندیم، 38 سالہ شکیل، 32 سالہ فیض احمد اور 42 سالہ وسیم شامل ہیں۔ ہسپتال انتظامیہ کے مطابق چاروں زخمیوں میں کوئی بچہ شامل نہیں اور تمام زخمی خطرے سے باہر ہیں۔
یہ بھی پڑھیں: لاہور میں قائم نجی ٹیوشن سینٹرز کا ہنگامی سروے کرانے کا فیصلہ
ایم ایس سروسز ہسپتال کا کہنا ہے کہ زخمیوں کے سروں پر گہری چوٹیں اور جسم کے مختلف حصوں میں فریکچر آئے ہیں۔ آرتھوپیڈک اور نیورو سرجری کے ماہر ڈاکٹر ایمرجنسی میں ان کا علاج کر رہے ہیں۔
واقعے کے بعد پولیس نے ٹیوشن سینٹر کی مالکہ نازیہ رضوان سمیت 6 ٹیچرز کو حراست میں لے لیا ہے۔ پولیس کے مطابق زیر حراست افراد سے تفتیش جاری ہے تاکہ حادثے کی وجوہات اور ممکنہ غفلت کا تعین کیا جا سکے۔
ادھر وزیر تعلیم پنجاب رانا سکندر حیات نے واقعے کا نوٹس لیتے ہوئے ایجوکیشن اتھارٹی لاہور سے فوری رپورٹ طلب کر لی ہے۔ انہوں نے متعلقہ حکام کو واقعے کی مکمل تحقیقات کرنے اور ذمہ داروں کے خلاف قانون کے مطابق کارروائی کی ہدایت بھی کی ہے۔
ریسکیو حکام کے مطابق جائے حادثہ پر ملبہ ہٹانے کا کام مکمل کر لیا گیا ہے جبکہ واقعے کی مزید تحقیقات جاری ہیں۔
