ای چالان سے پریشان شہریوں کے لیے بڑی خوشخبری
ترجمان سندھ حکومت سعدیہ جاوید نے اپنے بیان میں کہا کہ ای چالان سسٹم کے نفاذ پر ابتدا میں کافی مخالفت ہوئی، تاہم حکومت اس نظام کو مزید مؤثر اور عوام دوست بنانے کے لیے اقدامات کر رہی ہے۔
انہوں نے بتایا کہ وزیر اعلیٰ سندھ کو تجویز دی گئی ہے کہ سیٹ بیلٹ اور ہیلمٹ نہ پہننے پر جاری کیے جانے والے ای چالان ختم کر دیے جائیں تاکہ کم آمدنی والے شہریوں پر مالی بوجھ کم کیا جا سکے۔
سعدیہ جاوید کا کہنا تھا کہ کراچی میں تمام گاڑیوں میں ڈیش کیمز نصب نہیں ہیں جبکہ واٹر ٹینکرز میں بھی سو فیصد ٹریکرز نہیں لگائے جا سکے۔ ان کا کہنا تھا کہ بعض معاملات میں بھاری جرمانے کیے جا رہے ہیں اور بعض کیسز میں فوجداری مقدمات بھی درج کیے جا رہے ہیں۔
یہ بھی پڑھیں: استعمال شدہ گاڑیوں کی درآمد پر اضافی ڈیوٹی میں کمی
انہوں نے مزید کہا کہ پبلک ٹرانسپورٹرز کی ہڑتال کے باوجود حکومت نے دباؤ قبول نہیں کیا۔ ان کے مطابق اوور سپیڈنگ پر جرمانے دو سے ڈھائی لاکھ روپے تک بڑھائے جا چکے ہیں۔
ترجمان سندھ حکومت نے دعویٰ کیا کہ گزشتہ سال کے مقابلے میں رواں سال ٹریفک حادثات اور ڈکیتی کے دوران مزاحمت پر قتل کے واقعات میں کمی آئی ہے، جبکہ حادثات کی روک تھام کے لیے ٹریفک قوانین کو مزید سخت بنایا جا رہا ہے۔
کراچی میں پانی کی قلت کے حوالے سے سعدیہ جاوید نے کہا کہ کے فور منصوبہ بھی شہر کی بڑھتی ہوئی پانی کی ضروریات پوری کرنے کے لیے کافی نہیں ہوگا۔
