بارشوں کا طوفانی اسپیل، مختلف حادثات میں 9 افراد جاں بحق
محکمہ موسمیات نے آج بھی کئی علاقوں میں گرج چمک کے ساتھ بارش کی پیشگوئی کرتے ہوئے شہریوں کو احتیاط برتنے کی ہدایت کی ہے۔
رپورٹس کے مطابق خیبرپختونخوا، بلوچستان اور پنجاب مون سون بارشوں سے سب سے زیادہ متاثر ہوئے۔ خیبرپختونخوا میں مختلف واقعات میں ایک خاتون اور دو بچے جاں بحق ہوئے، جبکہ پنجاب کے ضلع اٹک میں طوفانی بارش کے دوران مکان اور دیوار گرنے سے تین افراد زندگی کی بازی ہار گئے۔
بلوچستان کے علاقے ژوب میں شدید بارشوں کے باعث مکانات منہدم ہونے سے ایک خاتون اور بچوں سمیت تین افراد جاں بحق جبکہ 10 افراد زخمی ہو گئے۔ زخمیوں کو قریبی اسپتال منتقل کر دیا گیا ہے، جہاں انہیں طبی امداد فراہم کی جا رہی ہے۔
یہ بھی پڑھیں:معروف ٹک ٹاکر علی حیدر آبادی نے اہلیہ کو طلاق دے دی، ویڈیو وائرل
دوسری جانب لاہور اور اسلام آباد میں وقفے وقفے سے دھوپ اور بادلوں کا سلسلہ جاری ہے، جبکہ آج بھی بارش کا امکان ظاہر کیا گیا ہے۔ کراچی میں بھی شہری رم جھم بارش کے منتظر ہیں، جبکہ محکمہ موسمیات کے مطابق گلگت بلتستان، کشمیر اور خیبرپختونخوا کے مختلف علاقوں میں گرج چمک کے ساتھ مزید بارشیں متوقع ہیں۔ آئندہ دو سے تین روز تک بارشوں کا سلسلہ جاری رہنے کی پیشگوئی کی گئی ہے۔
