پشاور: معروف قانون دان عمران خان مٹا مسلم لیگ ن میں شامل ہو گئے
رپورٹ کے مطابق پشاور ہائی کورٹ بار کے سابق جنرل سیکرٹری اور معروف قانون دان ایڈووکیٹ عمران خان مٹا نے وفاقی وزیر برائے امور کشمیر، گلگت بلتستان و سیفران اور صدر پاکستان مسلم لیگ (ن) خیبر پختونخوا انجینئر امیر مقام سے ان کی رہائش گاہ پر ملاقات کی۔
پشاور ہائی کورٹ بار کے جنرل سیکرٹری اشفاق احمد دادوزئی، مسلم لائرز فورم کے صدر ہدایت اللہ خان، جنرل سیکرٹری اکبر یوسف خان اور مسلم لائرز فورم کے دیگر عہدیداران بھی اس موقع پر موجود تھے۔
اس موقع پرعمران خان مٹانے اپنے خاندان اور ہزاروں ساتھیوں سمیت باضابطہ طور پر پاکستان مسلم لیگ (ن) میں شمولیت اختیار کر لی۔
صدر مسلم لیگ ن خیبرپختونخوا انجینئر امیر مقام نے ایڈووکیٹ عمران خان مٹا کو پارٹی میں شمولیت پر مبارکباد دی، انہیں خوش آمدید کہا اور پارٹی کیپ بھی پہنائی۔
یہ بھی پڑھیں: ن لیگ نے تحریک انصاف کی بڑی وکٹ گرا دی
لیگی رہنما انجینئر امیر مقام نے وکلا برادری کی خدمات کو خراجِ تحسین پیش کرتے ہوئے کہا کہ آئین کی بالادستی اور قانون کی حکمرانی کے فروغ میں وکلا کا ہمیشہ کلیدی کردار رہا ہے۔
ایڈووکیٹ عمران خان مٹا نے اس موقع پر لیگی قیادت پر مکمل اعتماد کا اظہار کرتے ہوئے کہا کہ وہ پارٹی قائد میاں محمد نواز شریف، وزیرِاعظم میاں محمد شہباز شریف اور انجینئر امیر مقام کی قیادت میں پارٹی کے ویژن، منشور اور عوامی خدمت کے مشن کو آگے بڑھانے کےلیے بھرپور کردار ادا کریں گے۔
