زیارات کیلئے عراق جانیوالے زائرین کیلئے نئی ہدایات جاری
وزارت مذہبی امور کی جانب سے جاری ہدایت کے مطابق 50 سال سے کم عمر افراد کے لیے فیملی کے بغیر عراق میں داخلہ ممنوع قرار دیا گیا ہے۔
ہدایات میں واضح کیا گیا ہے کہ 50 سال سے کم عمر زائرین صرف اپنی فیملی کے ہمراہ عراق جا سکیں گے، جبکہ اکیلے سفر کرنے کی صورت میں انہیں داخلے کی اجازت نہیں دی جائے گی۔
نوٹیفکیشن کے مطابق اگر 50 سال سے کم عمر کوئی زائر فیملی کے بغیر ویزا حاصل کرنے کی کوشش کرے یا اس کی درخواست مسترد ہو جائے تو ویزا فیس بھی واپس نہیں کی جائے گی۔
وزارت مذہبی امور نے زیارات گروپ آرگنائزرز کو بھی ہدایت کی ہے کہ وہ زائرین کو نئی شرائط سے مکمل طور پر آگاہ کریں تاکہ سفر سے قبل کسی قسم کی پریشانی کا سامنا نہ کرنا پڑے۔
سرکلر میں مزید بتایا گیا ہے کہ عراق زیارات کے لیے زائرین کو 30 دن کا ویزا جاری کیا جائے گا، تاہم یہ ویزا ایک ہی وقت میں عاشورہ اور اربعین دونوں مواقع کے لیے استعمال نہیں کیا جا سکے گا۔
یہ بھی پڑھیں: جعلی رسیدیں دینے اور سیل چھپانے والوں کیخلاف سخت کارروائی کا فیصلہ
اعلامیہ کے مطابق فیملیز کو ویزا جاری کرنے سے قبل ان کی باقاعدہ ویری فکیشن بھی کی جائے گی۔
وزارت مذہبی امور کے مطابق 50 سال سے زائد عمر کے زائرین عراق زیارات کے لیے جا سکتے ہیں، تاہم انہیں بھی جاری کردہ گائیڈ لائنز پر مکمل عملدرآمد کرنا ہوگا۔
حکام کا کہنا ہے کہ ان اقدامات کا مقصد زائرین کے سفر کو منظم، محفوظ اور عراقی قوانین کے مطابق بنانا ہے۔
