پاک فضائیہ کے تربیتی طیارے کو حادثہ، مریم نواز کا اظہار افسوس
وزیراعلیٰ پنجاب مریم نواز نے پاک فضائیہ کے تربیتی طیارہ کے حادثے میں جام شہادت نوش کرنے والے دونوں پائلٹس کیپٹن قاسم اور کیپٹن طلحہ کو خراج عقیدت پیش کیا۔
مریم نواز نے شہید پائلٹس کے لواحقین سے دلی ہمدردی اور تعزیت کا اظہار کیااور حادثے میں زخمیوں کی جلد صحتیابی کیلئے دعا کی۔
خیال رہے کہ آج مردان میں کاٹلنگ روڈ پر جبر نہر کے قریب ایک تربیتی طیارہ گر کر حادثے کا شکار ہوگیا جس کے نتیجے میں طیارے میں سوار 2 پائلٹ موقع پر شہید ہو گئے جبکہ حادثے کے نتیجے میں 2 راہگیر شدید زخمی ہوئے۔
یہ بھی پڑھیں: مردان، تربیتی طیارہ گر کر تباہ، 2 پائلٹ موقع پر شہید
حادثے کے فوراً بعد ریسکیو 1122 کی ٹیموں نے موقع پر پہنچ کر امدادی کارروائیاں شروع کر دیں، میڈیکل ٹیم نے زخمیوں کو ابتدائی طبی امداد فراہم کرنے کے بعد مزید علاج کے لیے قریبی ہسپتال منتقل کر دیا۔
عینی شاہدین کے مطابق طیارہ اچانک تکنیکی خرابی کے باعث نیچے آ گرا، تاہم حادثے کی اصل وجہ جاننے کے لیے متعلقہ اداروں کی جانب سے تحقیقات کا آغاز کر دیا گیا ہے۔
