سرکاری ملازمین نے شیر افضل مروت کو اسٹیج سے نیچے اتار دیا
واقعے کی ویڈیوز اور تصاویر سوشل میڈیا پر بھی توجہ حاصل کر رہی ہیں۔
تفصیلات کے مطابق شیر افضل مروت احتجاج کرنے والے سرکاری ملازمین سے اظہارِ یکجہتی کیلئے مظاہرے میں پہنچے اور مختلف شرکا سے ملاقات کی۔ اس دوران انہوں نے اسٹیج پر جا کر مظاہرین سے خطاب کرنے کی کوشش کی، تاہم احتجاج میں شریک سرکاری ملازمین نے انہیں خطاب کی اجازت نہ دی۔
مظاہرین کا مؤقف تھا کہ ان کا احتجاج مکمل طور پر غیر سیاسی ہے اور وہ اپنے پیشہ ورانہ اور معاشی مطالبات کے حق میں آواز بلند کر رہے ہیں۔ شرکا نے کہا کہ کسی بھی سیاسی شخصیت کی شمولیت سے احتجاج کا مقصد متاثر ہو سکتا ہے، اسی لیے وہ اپنے پلیٹ فارم کو سیاسی سرگرمیوں سے دور رکھنا چاہتے ہیں۔
عینی شاہدین کے مطابق ملازمین نے پرامن انداز میں شیر افضل مروت سے اسٹیج چھوڑنے کی درخواست کی، جس کے بعد وہ اسٹیج سے نیچے اتر آئے، اس موقع پر کسی قسم کی بدنظمی یا ناخوشگوار واقعہ پیش نہیں آیا۔
سیاسی مبصرین کا کہنا ہے کہ حالیہ برسوں میں مختلف شعبوں کے ملازمین اپنے مطالبات کیلئے غیر سیاسی پلیٹ فارمز کو ترجیح دے رہے ہیں اور اسی تناظر میں اس واقعے کو دیکھا جا رہا ہے۔
یہ بھی پڑھیں:سینئر سیاستدان تاج آفریدی ٹریفک حادثے میں جانبحق
دوسری جانب سوشل میڈیا پر بھی اس واقعے پر مختلف آرا سامنے آ رہی ہیں، جہاں بعض افراد ملازمین کے مؤقف کی حمایت کر رہے ہیں جبکہ بعض اسے سیاسی شخصیات کیلئے ایک اہم پیغام قرار دے رہے ہیں۔
