نئے اسلامی سال کا آغاز کب ؟ یکم محرم سے متعلق اہم اعلان
محکمہ موسمیات کے مطابق نئے چاند کی پیدائش 15 جون کو پاکستانی وقت کے مطابق صبح 7 بج کر 54 منٹ پر ہوگی، تاہم اسی روز ملک بھر میں چاند نظر آنے کا امکان نہ ہونے کے برابر ہے۔ ماہرین کے مطابق چاند کی رویت کے لیے صرف چاند کی پیدائش کافی نہیں ہوتی بلکہ غروب آفتاب کے وقت چاند کی عمر، افق پر اس کی بلندی، سورج اور چاند کے درمیان زاویائی فاصلہ اور موسمی حالات بھی انتہائی اہم کردار ادا کرتے ہیں۔
رویت ہلال ریسرچ کونسل کے مطابق 15 جون کو غروب آفتاب کے وقت پاکستان کے مختلف علاقوں میں چاند کی عمر 12 گھنٹوں سے بھی کم ہوگی، جبکہ عام طور پر ہلال کی رویت کے لیے چاند کی عمر 18 گھنٹے سے زائد ہونا ضروری سمجھی جاتی ہے۔ یہی وجہ ہے کہ 15 جون کو محرم الحرام کا چاند نظر آنے کا امکان نہیں ہے۔
یہ بھی پڑھیں: ملک بھر میں گرمی کی شدید لہر، محکمہ موسمیات نے خبردار کر دیا
محکمہ موسمیات کا کہنا ہے کہ 15 جون کو ملک کے زیادہ تر حصوں میں موسم صاف یا جزوی طور پر ابر آلود رہنے کی توقع ہے، تاہم موسم صاف ہونے کے باوجود چاند کی عمر کم ہونے کے باعث رویت ممکن نہیں ہوگی۔ اس صورتحال میں امکان ظاہر کیا جا رہا ہے کہ یکم محرم الحرام 1448 ہجری بدھ 17 جون کو ہوگی۔
اسلامی سال کا آغاز محرم الحرام سے ہوتا ہے، جو اسلامی کیلنڈر کا پہلا مہینہ ہے۔ اس ماہ کو دینی اور تاریخی اعتبار سے خاص اہمیت حاصل ہے۔ محرم الحرام کے آغاز کے ساتھ ہی ملک بھر میں سکیورٹی، مجالس، جلوسوں اور مذہبی اجتماعات کے حوالے سے انتظامات بھی شروع کر دیے جاتے ہیں۔
تاہم محرم الحرام کے چاند اور یکم محرم کی حتمی تاریخ کا اعلان مرکزی رویت ہلال کمیٹی کرے گی۔ کمیٹی ملک بھر سے موصول ہونے والی شہادتوں، محکمہ موسمیات کی رپورٹس اور شرعی اصولوں کا جائزہ لینے کے بعد باضابطہ اعلان کرے گی۔
عوام کو ہدایت کی گئی ہے کہ وہ محرم الحرام کے آغاز سے متعلق حتمی اعلان کے لیے مرکزی رویت ہلال کمیٹی کے سرکاری اعلان کا انتظار کریں۔
