وفاق کا صحت سہولت پروگرام دوبارہ شروع کرنے کا اعلان

وفاقی وزیر برائے قومی صحت سید مصطفیٰ کمال نے اعلان کیا ہے کہ کئی سال سے بند پڑا صحت سہولت پروگرام دوبارہ شروع کر دیا گیا ہے تاکہ غریب اور کم آمدنی والے افراد کو معیاری طبی خدمات تک آسان رسائی حاصل ہو سکے۔

وفاقی وزیر نے ڈاکٹر اکبر نیازی ٹیچنگ ہسپتال کے دورے کے دوران میڈیا سے گفتگو کرتے ہوئے کہا کہ حکومت صحت کے شعبے میں بہتری اور عوام کو بنیادی طبی سہولیات فراہم کرنے کے لیے سنجیدہ اقدامات کر رہی ہے۔ ان کا کہنا تھا کہ صحت سہولت پروگرام کے دوبارہ آغاز سے ہزاروں مستحق خاندانوں کو فائدہ پہنچے گا جو مہنگے علاج کے اخراجات برداشت کرنے کی استطاعت نہیں رکھتے۔

سید مصطفیٰ کمال نے بتایا کہ اسلام آباد اور راولپنڈی سمیت جڑواں شہروں کے 42 ہسپتالوں کو اس پروگرام میں شامل کیا گیا ہے۔ ان ہسپتالوں میں رجسٹرڈ مستحق مریض مختلف بیماریوں کے علاج، آپریشنز، تشخیصی ٹیسٹوں اور دیگر طبی خدمات سے مفت استفادہ کر سکیں گے۔

یہ بھی پڑھیں: ڈرائیونگ لائسنس کا نظام مکمل پیپر لیس اور کیش لیس ہو گیا

انہوں نے کہا کہ حکومت کی کوشش ہے کہ صحت کی سہولیات ہر شہری تک بلا امتیاز پہنچیں اور کوئی بھی شخص مالی مشکلات کی وجہ سے علاج سے محروم نہ رہے۔

وفاقی وزیر صحت نے اس بات پر بھی زور دیا کہ پروگرام میں شفافیت کو یقینی بنانے کے لیے سخت نگرانی کا نظام وضع کیا گیا ہے۔ ان کے مطابق اگر کوئی ہسپتال صحت سہولت پروگرام کے قواعد و ضوابط کی خلاف ورزی کرتا ہے یا کسی قسم کی بدعنوانی میں ملوث پایا جاتا ہے تو اس کے خلاف فوری کارروائی کی جائے گی اور اسے پروگرام سے خارج کر دیا جائے گا۔ انہوں نے واضح کیا کہ عوام کے لیے مختص وسائل کے غلط استعمال کی کسی صورت اجازت نہیں دی جائے گی۔

انہوں نے مزید کہا کہ صحت سہولت پروگرام کا مقصد صرف علاج کی فراہمی نہیں بلکہ عوام کا سرکاری نظامِ صحت پر اعتماد بحال کرنا بھی ہے۔ حکومت مستقبل میں اس پروگرام کے دائرہ کار کو مزید وسعت دینے پر بھی غور کر رہی ہے تاکہ ملک کے دیگر علاقوں کے مستحق افراد بھی اس سہولت سے فائدہ اٹھا سکیں۔