پنجاب: عید پر عوامی مقامات پر سری پائے بھوننے پر پابندی عائد
محکمہ لوکل گورنمنٹ کی جانب سے اس حوالے سے باقاعدہ نوٹیفکیشن جاری کر دیا گیا۔
نوٹیفکیشن کے مطابق دفعہ 144 کے تحت عوامی مقامات پر سری پائے جلانے، بھوننے اور آلائشیں تلف کرنے کے ایسے طریقوں پر پابندی ہوگی جن سے ماحولیاتی آلودگی پھیلنے کا خدشہ ہو۔
نوٹیفکیشن میں کہا گیا ہے کہ عید الاضحیٰ کے دوران مختلف علاقوں میں سری پائے جلانے کے باعث شدید دھواں اور بدبو پیدا ہوتی ہے جو ماحول کو آلودہ کرنے کے ساتھ ساتھ شہریوں کے لئے صحت کے مسائل بھی پیدا کرتی ہے۔
حکام کے مطابق اس عمل سے پھیلنے والا دھواں فضا میں شامل ہو کر سانس، آنکھوں اور دیگر بیماریوں میں اضافے کا سبب بن سکتا ہے۔
محکمہ لوکل گورنمنٹ نے تمام ڈپٹی کمشنرز، اسسٹنٹ کمشنرز اور متعلقہ بلدیاتی افسران کو ہدایت جاری کی ہے کہ وہ پابندی پر سختی سے عملدرآمد یقینی بنائیں اور خلاف ورزی کرنے والوں کے خلاف قانونی کارروائی عمل میں لائی جائے۔
یہ بھی پڑھیں: عید قربان سے قبل مویشی منڈیاں سج گئیں
حکام نے شہریوں سے اپیل کی ہے کہ وہ صفائی اور ماحول کو محفوظ رکھنے کے لئے حکومتی ہدایات پر عمل کریں اور قربانی کے جانوروں کی آلائشوں کو مقررہ مقامات پر تلف کریں۔
پنجاب حکومت کا کہنا ہے کہ عید کے دنوں میں صاف ستھرا ماحول برقرار رکھنے کے لئے خصوصی صفائی آپریشن بھی جاری رکھا جائے گا۔