عید قربان سے قبل مویشی منڈیاں سج گئیں
تاہم اس بار جانوروں کی آسمان سے باتیں کرتی قیمتوں نے شہریوں کو حیران اور پریشان کر دیا ہے۔
لاہور کی ایل ڈی اے مویشی منڈی میں مختلف نسلوں کے چھوٹے اور بڑے جانور فروخت کیلئے لائے جا رہے ہیں۔ بیوپاریوں کے مطابق چھوٹے جانوروں کی قیمتیں غیر معمولی حد تک بڑھ چکی ہیں جبکہ بڑے جانور ڈیڑھ لاکھ سے دو لاکھ روپے تک میں دستیاب ہیں۔
دوسری جانب خوبصورت کالے اور سفید بچھڑوں کی جوڑی کیلئے 14 لاکھ روپے تک مانگے جا رہے ہیں، جس نے خریداروں کو حیرت میں ڈال دیا ہے۔
منڈی میں چولستانی نسل کے بیل بھی خاص توجہ کا مرکز بنے ہوئے ہیں، جن کی قیمت دو لاکھ سے چار لاکھ روپے تک بتائی جا رہی ہے۔
بیوپاریوں کا کہنا ہے کہ جانوروں کی خوراک، نقل و حمل اور دیگر اخراجات میں اضافے کے باعث قیمتیں بڑھانا مجبوری بن چکا ہے۔
شدید گرمی کے باوجود مویشی منڈیوں میں جانوروں کی تعداد روز بروز بڑھ رہی ہے، تاہم خریداروں کی آمد ابھی محدود دکھائی دے رہی ہے۔ شہری مختلف منڈیوں کا رخ کر کے قیمتوں کا جائزہ لے رہے ہیں اور مناسب دام میں اچھا جانور خریدنے کی کوشش کر رہے ہیں۔
یہ بھی پڑھیں:خام تیل کی قیمتیں آسمان پر پہنچ گئیں
بیوپاری پُرامید ہیں کہ عید قربان قریب آنے کے ساتھ خریداروں کی تعداد بڑھے گی اور انہیں جانوروں کی منہ مانگی قیمت مل جائے گی۔