عدالت نے عمران خان سے ملاقات کی درخواست خارج کر دی
راولپنڈی کی انسداد دہشت گردی عدالت میں بانی پی ٹی آئی عمران خان کے وکیل فیصل ملک نے آج 9 مئی جی ایچ کیو حملہ کیس میں سابق وزیراعظم سے ملاقات کے لئے درخواست دائر کی۔
عدالت نے درخواست غیر ضروری قرار دے کر خارج کر دی اور درخواست گزار پر 10 ہزار روپے جرمانہ بھی عائد کرتے ہوئے درخواست گزار کو 10 ہزار روپے جرمانہ ڈسٹرکٹ بار راولپنڈی کی ڈسپنسری میں جمع کرانے کا حکم دے دیا۔
عدالت نے قرار دیا کہ یہ جرمانہ غریب مریضوں کے علاج پر خرچ کیا جائے گا۔
عدالتی فیصلے میں کہا گیا کہ اڈیالہ جیل میں ملاقاتوں کا طریقہ کار اسلام آباد ہائی کورٹ پہلے ہی طے کر چکی ہے، ٹرائل کورٹ ملاقاتوں پر کوئی متضاد حکم جاری نہیں کر سکتی۔
یہ بھی پڑھیں: خیبر پختونخوا حکومت کا قلم چھوڑ ہڑتال کا اعلان
فیصلے میں کہا گیا کہ بانی پی ٹی آئی عمران خان جی ایچ کیو حملہ کیس میں ضمانت پر ہیں جوڈیشل تحویل میں نہیں، عمران خان سے ملاقات کے لئے اس سے قبل بھی اسی نوعیت کی دو درخواستیں دائر کی گئی ہیں۔
عدالت نے فیصلے میں قرار دیا کہ متعلقہ فورم سے رجوع کرنے کے بجائے درخواست گزار عدالت کا وقت ضائع کر رہا ہے۔
