وزیراعظم اپنا گھر سکیم کا باضابطہ اجراء، چیک تقسیم
’وزیراعظم اپنا گھر سکیم ‘کے تحت ایک کروڑ روپے تک قرض آسان شرائط پر دیا جا رہا ہے، اس سکیم کا اطلاق گلگت بلتستان اور آزاد کشمیر سمیت چاروں صوبوں پر ہو گا۔
وزیراعظم شہباز شریف نے اپنا گھر سکیم کے تحت قرض حاصل کرنے والے کامیاب امیدواروں کے درمیان بینک چیک تقسیم کیے اور انہیں مبارکباد دی۔
محمد شہباز شریف نے کہا کہ وزیراعظم اپنا گھر سکیم کی تقریب میں شرکت میرے لیے باعث مسرت ہے، چھت کی فراہمی مقدس فریضہ ہے، بجٹ میں بڑی چیزیں لے کر آئیں گے۔
انہوں نے کہا کہ ریاست یا کسی بھی حکومت کیلئے عام آدمی کو چھت فراہمی انتہائی اہمیت کی حامل ہے، عام آدمی کو چھت کی فراہمی ہماری حکومت کی ترجیح ہے، گھر ہو تو اپنا،اس حوالے سے یہ تقریب انتہائی یادگار ہے۔
وزیر اعظم کا کہنا تھا کہ سکیم کے تحت پہلا ہدف 50 ہزار گھروں کے لیے قرض ہے، اس سکیم کے لیے 321 ارب روپے کی فنانسنگ مختص کی گئی ہے، آئندہ 4 برس میں ہمارا ہدف 5 لاکھ گھروں کا ہے، سکیم کو کامیاب بنانے میں بے حد محنت کی گئی ہے۔
یہ بھی پڑھیں: اسٹیٹ بینک کا اپنا گھر اسکیم کیلئے بڑا اقدام
انہوں نے بتایا کہ حکومتی اکابرین اور نجی شعبے کی مشاورت سے سکیم کا اجراء کیا جا رہا ہے، آج کی اس تقریب میں ڈرائیور غلام حسین کو بھی گھر بنانے کیلئے قرض ملا، لوگوں کی بڑی تعداد جو اپنے گھر سے محروم ہے، اس سکیم کے تحت 10 مرلے کی زمین تک گھر بنایا جا سکے گا، ماہانہ بنیادوں پر سکیم پر عملدرآمد کا خود جائزہ لوں گا۔
وزیراعظم کا کہنا ہے کہ تعمیراتی شعبے سے معیشت کا پہیہ چلتا ہے، سکیم میں شامل بینکوں کو 14 اگست پر میڈل دیے جائیں گے، حکومت برآمد کنندگان کی حوصلہ افزائی کر رہی ہے، مایہ ناز بر آمد کنندگان کو سفیر عمومی بنایا، 2 سال کیلئے بلیو پاسپورٹ دیا۔
