محکمہ تعلیم سندھ کی جانب سے جاری کردہ سرکلر کے مطابق میٹرک کے طلبہ سے مارچ 2026 تک ہی فیس وصول کی جائے گی جبکہ اپریل 2026 کے امتحانات دینے والے طلبہ سے کسی بھی قسم کی اضافی فیس لینے پر پابندی عائد کر دی گئی ہے۔

نئے قواعد کے تحت جماعت نہم سے دہم میں جانے والے طلبہ سے جون اور جولائی 2026 کی فیس اپریل اور مئی میں پیشگی وصول کی جائے گی تاکہ مالی امور کو بہتر انداز میں منظم کیا جا سکے۔

پری پرائمری سے جماعت نہم تک کے طلبہ کے لیے بھی نیا فیس سسٹم متعارف کرایا گیا ہے جس کے تحت اسکولوں کو اپریل تا جون اور مئی تا جولائی کے لیے الگ الگ فیس واؤچرز جاری کرنا ہوں گے تاکہ ریکارڈ میں شفافیت برقرار رکھی جا سکے۔

یہ بھی پڑھیں: عیدالاضحیٰ 2026: طویل چھٹیوں کا امکان، تاریخیں سامنے آ گئیں

مزید برآں، فیس واؤچرز کی مدت بھی مقرر کر دی گئی ہے جس کے مطابق جون کے واؤچرز 30 جون تک جبکہ جولائی کے واؤچرز 31 جولائی تک قابلِ قبول ہوں گے۔

محکمہ تعلیم نے خبردار کیا ہے کہ ان ہدایات پر سختی سے عملدرآمد کرایا جائے گا اور خلاف ورزی کرنے والے تعلیمی اداروں کے خلاف کارروائی کی جائے گی۔