پاکستان میں شوال کا چاند دیکھنے کے لیے مرکزی رویت ہلال کمیٹی کا اجلاس آج اسلام آباد میں منعقد ہوگا۔ یہ اجلاس چیئرمین مرکزی رویت ہلال کمیٹی مولانا عبدالخبیر آزاد کی سربراہی میں وزارت مذہبی امور کے دفتر میں ہوگا۔ اس کے ساتھ ساتھ ملک بھر میں زونل رویت ہلال کمیٹیوں کے اجلاس بھی اپنے اپنے متعلقہ زونل ہیڈکوارٹرز میں منعقد کیے جائیں گے۔ اجلاسوں میں موصول ہونے والی شہادتوں اور مختلف علاقوں سے حاصل ہونے والی اطلاعات کا تفصیلی جائزہ لیا جائے گا، جس کے بعد پاکستان میں عیدالفطر کی تاریخ کا باضابطہ اعلان کیا جائے گا۔

یہ بھی پڑھیں: عید پر 5 چھٹیوں کا اعلان، نوٹیفکیشن جاری

دوسری جانب افغانستان میں شوال کا چاند نظر آنے کی اطلاعات سامنے آئی ہیں، جس کے بعد وہاں آج عیدالفطر منائی جا رہی ہے۔ افغانستان کی سپریم کورٹ کے مطابق صوبہ فراہ، ہلمند اور غور میں متعدد افراد نے شوال کا چاند دیکھنے کی شہادت دی۔ ان شہادتوں کو جانچنے کے بعد انہیں قابل اعتماد قرار دیا گیا، جس کے بعد عیدالفطر منانے کا اعلان کیا گیا۔ افغانستان میں اس اعلان کے بعد عید کی تیاریاں مکمل کر لی گئی ہیں اور عوام مذہبی جوش و خروش کے ساتھ یہ تہوار منا رہے ہیں۔

سعودی عرب میں بھی شوال کے چاند کی رویت کے لیے مختلف آبزرویٹریوں اور رویت ہلال کمیٹیوں نے آسمان کا بغور مشاہدہ کیا، تاہم کہیں سے بھی چاند نظر آنے کی مصدقہ شہادت موصول نہیں ہوئی۔ سعودی سپریم کورٹ نے ملک بھر سے آنے والی تمام رپورٹس کا جائزہ لینے کے بعد اعلان کیا کہ رمضان المبارک کے 30 روزے مکمل ہوں گے اور عیدالفطر جمعہ 20 مارچ 2026 کو منائی جائے گی۔

یوں اس سال بھی بعض اسلامی ممالک میں عید مختلف دنوں میں منائی جا رہی ہے۔ پاکستان میں آج ہونے والا اجلاس نہایت اہمیت اختیار کر گیا ہے کیونکہ اسی کے بعد یہ فیصلہ ہوگا کہ ملک میں عیدالفطر کل ہوگی یا ایک روز بعد۔ عوام کی نظریں اب مرکزی رویت ہلال کمیٹی کے اعلان پر لگی ہوئی ہیں۔