اس حوالے سے وزیر بلدیات سندھ ناصر حسین شاہ نے اعلان کرتے ہوئے کہا کہ جمعتہ الوداع کے دن سرکاری دفاتر بند رہیں گے۔
ناصر حسین شاہ کے مطابق سندھ حکومت نے اس دن کے مذہبی تقدس اور عوامی جذبات کو مدنظر رکھتے ہوئے تعطیل کا فیصلہ کیا ہے۔
انہوں نے کہا کہ کراچی کی ایک اہم شاہراہ کو ایران کے سپریم لیڈر آیت اللہ علی خامنہ ای کے نام سے منسوب کیا جائے گا، تاہم انہوں نے واضح کیا کہ جمعتہ الوداع کے موقع پر شارع فیصل پر کسی بھی قسم کی ریلی نکالنے کی اجازت نہیں دی جائے گی۔
وزیر بلدیات نے مختلف مذہبی اور سیاسی تنظیموں سے اپیل کی ہے کہ وہ امن و امان کی صورتحال برقرار رکھنے کیلئے اپنے روایتی اور پہلے سے طے شدہ راستوں پر ہی ریلیاں نکالیں، انتظامیہ نے شہر میں سکیورٹی کے خصوصی انتظامات کیے ہیں تاکہ کسی بھی ناخوشگوار واقعے سے بچا جا سکے۔
یہ بھی پڑھیں:ہفتے میں چار دن ورکنگ ڈے کا نوٹیفکیشن جاری
دوسری جانب آج یوم علی کے موقع پر بھی ملک بھر کے چھوٹے بڑے شہروں میں جلوس برآمد کیے جا رہے ہیں۔ کراچی میں سکیورٹی خدشات کے پیش نظر صدر کے علاقے کی متعدد سڑکوں اور گلیوں کو کنٹینرز رکھ کر بند کر دیا گیا ہے جبکہ پولیس اور رینجرز کی بھاری نفری تعینات کر دی گئی ہے۔
حکام کے مطابق جلوسوں کے راستوں پر سخت نگرانی کی جا رہی ہے اور شہریوں سے تعاون کی اپیل کی گئی ہے تاکہ مذہبی تقریبات پرامن طریقے سے مکمل ہو سکیں۔
