کابینہ ڈویژن کی جانب سے جاری کردہ نوٹیفکیشن کے مطابق ہفتے میں بروز پیر، منگل، بدھ اور جمعرات کو دفاتر کھولے جائیں گے جبکہ بروز جمعہ، ہفتہ اور اتوار کو دفاتر میں چھٹی ہو گی۔
نوٹیفکیشن میں تمام وفاقی اور صوبائی حکومتی اداروں میں گریڈ 20 يا 3 لاکھ روپے سے زائد تنخواہ وصول کرنے والے افسران کو رضاکارانہ طور پر 2 دن کی تنخواہ کی کٹوتی کی ہدایت کی گئی ہے،تنخواہوں میں کٹوتی کا اطلاق شعبہ صحت اور تعلیم پر نہیں ہو گا۔
نوٹیفکیشن وزیرِ اعظم پاکستان محمد شہباز شریف کی جانب گزشتہ روز اعلان کردہ کفایت شعاری مہم کے سلسلے میں جاری کیا گیا ہے۔
دوسری جانب پنجاب حکومت نے بھی سخت کفایت شعاری اقدامات پر باقاعدہ نوٹیفکیشن جاری کر دیا، وزیراعلیٰ پنجاب مریم نواز کی ہدایت پر سرکاری اخراجات کم کرنے کے لیے علمدرآمد ہدایت نامہ جاری کر دیا گیا۔
سرکاری افسران کی گاڑیوں کے لیے تیل کوٹہ 50 فیصد کم کرنے کا نوٹیفکیشن جاری کیا گیا ہے جبکہ صوبائی وزراء اور اعلیٰ سرکاری افسران کے ساتھ پروٹوکول گاڑیوں پر پابندی عائد کردی گئی، وزراء اور اعلیٰ افسران کے ساتھ سکیورٹی گاڑیوں کی تعداد بھی محدود کر دی گئی جبکہ جون 2026 تک نئی سرکاری گاڑیاں خریدنے پر پابندی برقرار رکھنے کا حکم دیا گیا ہے۔
نوٹیفکیشن کے مطابق پنجاب میں سرکاری دفاتر چار روز پیر سے جمعرات تک کھلے رہیں گے جبکہ جمعہ، ہفتہ اور اتوار سرکاری دفاتر میں چھٹی ہو گی تاہم اہم اور ضروری خدمات پر چار روزہ ہفتہ لاگو نہیں ہو گا۔
یہ بھی پڑھیں: وزیراعظم کا پٹرولیم مصنوعات کی قیمتوں میں مزید اضافے کا عندیہ
دفاتر میں صرف ضروری عملہ طلب کرنے اور سرکاری اجلاسوں کو آن لائن کرنے کی ہدایت جبکہ سرکاری محکموں میں ورک فرام ہوم پالیسی پر عملدرآمد اور سرکاری اخراجات کم کرنے کے لیے سفر اور رہائش کے اخراجات محدود کرنے کا حکم دیا گیا ہے، نجی شعبے کو بھی ورک فرام ہوم اور غیر ضروری تقریبات محدود کرنے، عوام کو غیر ضروری اجتماعات اور تقریبات سے گریز کرنے کی ہدایت کی گئی ہے۔
حکومت کی جانب سے سرکاری عشائیوں پر مکمل پابندی کر دی گئی، صرف غیر ملکی وفود کے اعزاز میں اجازت ہو گی، سرکاری سیمینار، ٹریننگ اور کانفرنس کے لیے پیشگی منظوری لازمی قرار دی گئی ہے۔
پٹرولیم مصنوعات کی فراہمی کی نگرانی کے لیے ضلعی کمیٹیاں قائم کر دی گئیں، پٹرولیم مصنوعات کی نگرانی کے لیے ٹریک اینڈ ٹریس سسٹم بھی نافذ کر دیا گیا، تمام اضلاع میں ٹرانسپورٹ کرایوں کی سخت نگرانی کا حکم اور ضروری اشیاء کی دستیابی یقینی بنانے کی ہدایت کی گئی ہے۔
