بے نظیر انکم سپورٹ پروگرام کی سربراہ سینیٹر روبینہ خالد نے ماہ صیام کی آمد پر مستحق خواتین کے لیے بڑی خوشخبری کا اعلان کرتے ہوئے سہ ماہی قسط 13 ہزار 500 روپے سے بڑھا کر 14 ہزار 500 روپے کر دی۔

بی آئی ایس پی ہیڈ کوارٹرز اسلام آباد میں لائیو ای کچہری کا انعقاد کیا گیا جس کے دوران سینیٹر روبینہ خالد نے بتایا کہ بے نظیر کفالت پروگرام کی سہ ماہی قسط میں ایک ہزار روپے کا اضافہ کر نے کا فیصلہ کیا گیا ہے۔

انہوں نے بتایا کہ اس اضافے کے بعد بے نظیر انکم سپورٹ پروگرام کے تحت مستحق خواتین کو اب 13 ہزار 500 روپے کے بجائے 14 ہزار 500 روپے کی ادائیگی کی جائے گی۔

یہ بھی پڑھیں: بینظیر انکم سپورٹ پروگرام، ادائیگیوں کا نیا نظام متعارف

سربراہ بی آئی ایس پی کا کہنا تھا کہ اس کے علاوہ بے نظیر تعلیمی وظائف اور بے نظیر نشوونما پروگرام کی رقوم میں بھی 500 روپے اضافے کا فیصلہ کیا گیا ہے تاکہ ماؤں اور بچوں کو مزید سہولیات کی فراہمی کو یقینی بنایا جا سکے۔

سینیٹر روبیہ خالد نے کہا کہ مستحق خواتین بے نظیر انکم سپورٹ کی مکمل رقم وصول کریں اور کسی بھی قسم کی کٹوتی کو برداشت نہ کیا جائے، کسی بھی شکایات کی صورت میں بی آئی ایس پی ہیلپ لائن 080026477 پر رابطہ کریں یا بی آئی ایس پی کے قریبی دفتر سے رجوع کریں۔