تفصیلات کے مطابق تحریک تحفظ آئین پاکستان کے وفد نے جمعیت علماء اسلام کے سربراہ مولانا فضل الرحمن سے ملاقات کی جس کے بعد اپوزیشن لیڈر محمود خان اچکزئی اور مولانا فضل الرحمن نے پریس کانفرنس کرتے ہوئے کہا کہ جے یو آئی نے 8 فروری کے اپنے جلسے منسوخ کرنے اور اپوزیشن کی پہیہ جام ہڑتال کی حمایت کا اعلان کردیا۔
یہ بھی پڑھیں: عمران خان اور بشریٰ بی بی کی عبوری ضمانتوں میں توسیع
اپوزیشن لیڈر محمود خان اچکزئی نے کہا کہ ہم سب کہتے ہیں 8 فروری کو زور زبردستی عوامی مینڈیٹ چوری کیا گیا، عوام پرجبر کیا گیا۔ انہوں نے کہا کہ پیکا ایکٹ سمیت کالے قوانین لائے گئے، عدلیہ کے پر کاٹے گئے، جے یو آئی جلسے کرنا چاہتی تھی، ہم پہیہ جام کرنا چاہتے تھے۔
مولانا فضل الرحمن نے کہا ہے کہ ہم اپوزیشن کی پہیہ جام کی حمایت کرتے ہیں، ہم 8 فروری کو اپنے جلسے جلوس منسوخ کرتے ہیں، ہم اپنے جلسے جلوس آٹھ فروری کے بعد کریں گے۔ انہوں نے کہا کہ ضمنی انتخابات بھی چرائے جا رہے ہیں، ہمارا موقف ایک ہے، ہم نئے الیکشن کا مطالبہ کرتے ہیں۔
اسد قیصر نے کہا کہ اسلام آباد دھماکے کی شدید مذمت کرتا ہوں، وزیر اعظم ایوان میں آکر انسداد دہشتگردی کی پالیسی دیں، نیشنل ایکشن پلان پر عمل چاہتے ہیں مگر ہماری بات کو سنجیدہ نہیں لیا جا رہا ہے، عمران کے ڈاکٹرز کو تو ملنے دیا جائے۔
