محکمہ موسمیات کے مطابق مغربی ہواؤں کا ایک طاقتور سلسلہ آج رات پاکستان کے مغربی علاقوں میں داخل ہوگا، جو پیر تک بالائی علاقوں پر اثر انداز رہے گا۔
محکمہ موسمیات کا کہنا ہے کہ اس موسمی نظام کے باعث بلوچستان کے بیشتر اضلاع، گلگت بلتستان، آزاد کشمیر، خیبر پختونخوا، اسلام آباد، مری اور گلیات میں بارش متوقع ہے، جبکہ بلند و بالا پہاڑی علاقوں میں برف باری کا امکان بھی موجود ہے۔ برف باری کے باعث درجہ حرارت میں نمایاں کمی آسکتی ہے اور سردی کی شدت میں اضافہ ہوگا۔
پنجاب کے مختلف شہروں لاہور، ملتان، فیصل آباد اور گرد و نواح میں بھی وقفے وقفے سے بارش کا امکان ظاہر کیا گیا ہے۔ بارش کے باعث فضائی آلودگی میں کمی اور موسم خوشگوار ہونے کی توقع ہے، تاہم بعض علاقوں میں پھسلن اور ٹریفک کی روانی متاثر ہونے کا خدشہ بھی ہے۔
یہ بھی پڑھیں:نجی تعلیمی اداروں پر نئی پابندی عائد، مراسلہ جاری
محکمہ موسمیات کی جانب سے خبردار کیا گیا ہے کہ شدید بارش اور برف باری کے باعث بالائی علاقوں میں لینڈ سلائیڈنگ جبکہ میدانی علاقوں میں نشیبی مقامات پر پانی جمع ہونے کا امکان ہے۔
سیاحوں کو مری، گلیات اور شمالی علاقوں کا سفر احتیاط سے کرنے اور تازہ موسمی صورتحال سے آگاہ رہنے کی ہدایت کی گئی ہے۔
شہریوں سے اپیل کی گئی ہے کہ غیر ضروری سفر سے گریز کریں، گرم لباس کا اہتمام کریں اور موسم سے متعلق سرکاری ہدایات پر عمل کریں تاکہ کسی بھی ممکنہ نقصان سے بچا جا سکے۔
