محکمہ موسمیات کے مطابق ناران، کاغان، دیر، سوات، کالام، چترال، کوہستان، مانسہرہ، ایبٹ آباد، شانگلہ، استور، ہنزہ، اسکردو، مری، گلیات، وادیٔ نیلم، باغ، پونچھ، حویلی اور راولاکوٹ سمیت کئی بالائی اور پہاڑی علاقوں میں بارش اور برفباری کے نتیجے میں سڑکوں کے بند ہونے کا امکان ہے۔ ان علاقوں میں سفر کرنے والوں کو خاص طور پر محتاط رہنے اور غیر ضروری سفر سے گریز کرنے کی ہدایت کی گئی ہے۔
محکمہ موسمیات نے بتایا ہے کہ شدید بارش اور برفباری کے باعث بالائی خیبر پختونخوا، کشمیر اور گلگت بلتستان کے مقامی ندی نالوں میں طغیانی کا خدشہ ہے، جبکہ پہاڑی علاقوں میں لینڈ سلائیڈنگ اور برفانی تودے گرنے کا خطرہ بھی موجود ہے۔ سیاحوں اور مقامی آبادی کو موسمی صورتحال کے پیش نظر الرٹس پر عمل کرنے اور احتیاطی تدابیر اختیار کرنے کی تاکید کی گئی ہے۔
یہ بھی پڑھیں: سوات و گردونواح میں زلزلے کے جھٹکے، شہری خوفزدہ
جمعرات کے روز خیبر پختونخوا، کشمیر، گلگت بلتستان، اسلام آباد اور بالائی و وسطی پنجاب میں بیشتر مقامات پر تیز ہواؤں اور گرج چمک کے ساتھ وقفے وقفے سے بارش جبکہ پہاڑوں پر برفباری کا امکان ظاہر کیا گیا ہے۔ بعض بالائی علاقوں میں درمیانی سے شدید بارش اور برفباری بھی ہو سکتی ہے۔ اسی دوران جنوبی پنجاب، سندھ اور شمالی و شمال مشرقی بلوچستان کے چند علاقوں میں بھی تیز ہواؤں اور گرج چمک کے ساتھ بارش متوقع ہے۔
محکمہ موسمیات کے مطابق آج جمعہ کے روز بھی بالائی خیبر پختونخوا، کشمیر، گلگت بلتستان، اسلام آباد اور بالائی پنجاب میں بارش اور برفباری کا سلسلہ جاری رہنے کا امکان ہے، جبکہ ملک کے دیگر علاقوں میں موسم سرد اور خشک رہنے کی توقع ہے۔
گزشتہ 24 گھنٹوں کے دوران خیبر پختونخوا، بلوچستان، پنجاب اور سندھ کے مختلف علاقوں میں کہیں کہیں بارش اور پہاڑوں پر برفباری ریکارڈ کی گئی۔ سب سے زیادہ بارش پاراچنار میں 88 ملی میٹر ریکارڈ کی گئی، جبکہ پنجاب، بلوچستان اور سندھ کے مختلف شہروں میں بھی ہلکی سے درمیانی بارش ہوئی۔ اسی دوران پاراچنار، کوئٹہ اور قلات میں دو انچ تک برفباری ریکارڈ کی گئی۔
کم سے کم درجہ حرارت کے مطابق لہہ میں منفی 11، گوپس، اسکردو، بگروٹ اور پاراچنار میں منفی 5، کالام میں منفی 4 اور مالم جبہ میں منفی 3 ڈگری سینٹی گریڈ ریکارڈ کیا گیا۔ محکمہ موسمیات اور متعلقہ اداروں نے شہریوں کو ہدایت کی ہے کہ وہ غیر ضروری سفر سے اجتناب کریں اور کسی بھی ہنگامی صورتحال سے نمٹنے کے لیے پیشگی احتیاطی تدابیر اختیار کریں۔
