ذرائع کے مطابق جنید صفدر کی شادی کی تقریبات محدود اور سادہ رکھنے کا فیصلہ کیا گیا ہے، جس میں غیر ضروری نمود و نمائش سے گریز کیا جائے گا۔ شادی کارڈ کے منظر عام پر آنے کے بعد سوشل میڈیا پر صارفین مختلف تبصرے کر رہے ہیں، جبکہ بعض حلقوں کی جانب سے اسے پاکستان کی معروف سیاسی خاندان کی نجی تقریب قرار دیا جا رہا ہے۔

یہ بھی پڑھیں: سیاسی شخصیات کے ناموں پر فینسی نمبر پلیٹس کی نیلامی کا اعلان

سابق وزیراعظم نواز شریف بھی گزشتہ ماہ دسمبر میں اپنے نواسے جنید صفدر کی شادی کی تیاریوں کے سلسلے میں وزیراعلیٰ پنجاب مریم نواز کے ہمراہ دبئی روانہ ہوئے تھے۔ اس دورے کے دوران شادی سے متعلق بعض خاندانی معاملات کو حتمی شکل دی گئی، جس کے بعد اب شادی کی تاریخیں اور مقامات سامنے آئے ہیں۔

واضح رہے کہ گزشتہ کچھ عرصے سے مریم نواز کے صاحبزادے کی شادی کی تیاریوں سے متعلق خبریں گردش کر رہی تھیں، تاہم اب باضابطہ دعوت نامہ وائرل ہونے کے بعد ان خبروں کی تصدیق ہو گئی ہے۔ اطلاعات کے مطابق جنید صفدر کی ہونے والی اہلیہ شانزے شیخ ہیں، جو معروف شخصیت شیخ روحیل اصغر کی پوتی ہیں۔ شیخ روحیل اصغر اس حوالے سے پہلے ہی بتا چکے ہیں کہ شادی کی تقریبات 16، 17 اور 18 جنوری کو منعقد ہوں گی۔

مہندی کی تقریب جاتی امرا میں ہوگی، بارات نجی سوسائٹی میں منعقد کی جائے گی جبکہ ولیمہ کی تقریب بھی جاتی امرا میں ہی ہوگی۔ انہوں نے اس بات پر زور دیا تھا کہ شادی کسی عوامی جلسے کی صورت نہیں ہوگی بلکہ یہ ایک نجی خاندانی تقریب ہوگی، جس میں محدود تعداد میں مہمانوں کو مدعو کیا جائے گا۔

یاد رہے کہ جنید صفدر کی اس سے قبل شادی معروف کاروباری شخصیت سیف الرحمان کی صاحبزادی سے ہوئی تھی، تاہم یہ رشتہ اکتوبر 2023 میں طلاق پر ختم ہو گیا تھا۔ اب جنید صفدر کی دوسری شادی کی خبر سامنے آنے کے بعد عوامی دلچسپی ایک بار پھر اس سیاسی خاندان کی نجی زندگی پر مرکوز ہو گئی ہے۔