صوبائی وزیر ایکسائز اینڈ ٹیکسیشن فخر جہاں کے مطابق صدر مملکت آصف علی زرداری، سابق وزیراعظم نواز شریف اور بانی پاکستان تحریک انصاف (پی ٹی آئی) عمران خان سمیت دیگر اہم سیاسی شخصیات کے ناموں پر نمبر پلیٹس کی نیلامی کی جائے گی۔

انہوں نے بتایا کہ یونیک چوائس نمبر پلیٹس کی باقاعدہ نیلامی 27 جنوری کو پشاور کے نشتر ہال میں منعقد ہوگی، جہاں فینسی نمبر پلیٹس کی بولی کا آغاز 10 لاکھ روپے سے کیا جائے گا۔

وزیر ایکسائز کا کہنا تھا کہ نیلامی کے دوران سب سے زیادہ بولی دینے والے کو اپنی من پسند سیاسی شخصیت کے نام کی نمبر پلیٹ الاٹ کی جائے گی، یہ عمل مرحلہ وار ہوگا، جس میں آئندہ قومی قیادت، معروف شخصیات، علاقوں اور مختلف اقوام کے ناموں پر بھی فینسی نمبر پلیٹس کی نیلامی کی جائے گی۔

فخر جہاں نے مزید بتایا کہ اس عمل میں میں گاڑی مالکان بھرپور دلچسپی لے رہے ہیں، اس منصوبے سے صوبائی خزانے کو نمایاں مالی فائدہ متوقع ہے۔

یہ بھی پڑھیں:مسافر ٹرین پر کرین گرنے سے 22 افراد لقمہ اجل بن گئے

انہوں نے کہا کہ یونیک نمبر پلیٹس کے حصول کیلئے شہریوں نے محکمہ ایکسائز کی دستک ایپ کے ذریعے درخواستیں دینا شروع کر دی ہیں، جس سے عمل کو شفاف اور آسان بنایا گیا ہے۔

محکمہ ایکسائز اینڈ ٹیکسیشن خیبرپختونخوا کے مطابق فینسی نمبر پلیٹس کی نیلامی سے متعلق باقاعدہ اشتہار بھی جاری کر دیا گیا ہے۔

نیلامی میں شرکت کے خواہشمند شہری 26 جنوری 2026 تک دستک ایپ کے ذریعے اپنی درخواستیں جمع کروا سکتے ہیں