موٹروے پولیس کے مطابق شہریوں کی جان و مال کے تحفظ کے پیشِ نظر یہ اقدام اٹھایا گیا ہے تاکہ ممکنہ حادثات سے بچا جا سکے۔

ترجمان سنٹرل ریجن سید عمران احمد نے بتایا کہ موٹر وے ایم 4 پنڈی بھٹیاں سے گوجرہ تک شدید دھند کے باعث بند کر دی گئی ہے۔ اسی طرح موٹر وے ایم 2 لاہور سے کوٹ مومن تک دھند کی وجہ سے ٹریفک کیلئے بند ہے، جبکہ لاہور سیالکوٹ موٹروے ایم 11 پر بھی حدِ نگاہ نہ ہونے کے باعث آمدورفت معطل کر دی گئی ہے۔

ترجمان کے مطابق موٹر وے ایم 3 فیض پور سے سمندری تک دھند کے باعث بند ہے، دھند کے دوران لین کی خلاف ورزی اور تیز رفتاری حادثات کا سبب بن سکتی ہے، اس لیے ڈرائیور حضرات لین ڈسپلن پر سختی سے عمل کریں۔

موٹروے پولیس کی جانب سے شہریوں کو ہدایت کی گئی ہے کہ وہ غیر ضروری سفر سے گریز کریں اور ممکن ہو تو دن کے اوقات میں سفر کو ترجیح دیں، دھند کے دوران صبح 10 بجے سے شام 6 بجے تک کے اوقات نسبتاً محفوظ تصور کیے جاتے ہیں۔

یہ بھی پڑھیں:بجلی کی جبری لوڈشیڈنگ، الیکٹرک بس سروس گھنٹوں معطل

ڈرائیور حضرات کو فوگ لائٹس کے لازمی استعمال، رفتار کم رکھنے اور آگے چلنے والی گاڑی سے محفوظ فاصلہ برقرار رکھنے کی بھی ہدایت کی گئی ہے۔

کسی بھی قسم کی رہنمائی یا مدد کیلئے موٹروے پولیس کی ہیلپ لائن 130 پر رابطہ کرنے کی اپیل کی گئی ہے۔