کمپنی ترجمان کے مطابق سرد موسم کے باعث گیس سسٹم میں لائن پیک اور پریشر ڈراپ کے مسائل سامنے آئے ہیں، جس کی وجہ سے صنعتوں کو 11 جنوری کی صبح 8 بجے سے 12 جنوری کی صبح 8 بجے تک گیس فراہم نہیں کی جائے گی۔

ترجمان کی جانب سے واضح کیا گیا کہ گھریلو اور کمرشل صارفین کو قانون کے مطابق پہلی ترجیح حاصل ہے، اس لیے ان کیلئے گیس کی فراہمی متاثر نہیں ہوگی۔ انہوں نے شہریوں کو ہدایت کی کہ وہ گھریلو اور کمرشل استعمال میں محتاط رہیں تاکہ گیس کی کمی کے دوران مشکلات کم سے کم ہوں۔

سوئی سدرن گیس کے مطابق پچھلے اتوار بھی صنعتوں کو پورا دن گیس فراہم نہیں کی گئی تھی، تاکہ گھریلو اور کمرشل صارفین کی ضروریات پوری کی جا سکیں۔ مزید بتایا گیا کہ گھریلو صارفین کیلئے رات 9:30 بجے سے صبح 6 بجے تک گیس کی فراہمی پہلے ہی محدود کی جاتی رہی ہے۔

واضح رہے کہ سردی کے باعث گیس کی کھپت میں اضافہ ہوا ہے، جس سے نظام پر دباؤ بڑھ گیا ہے۔ کمپنی کی طرف سے یہ فیصلہ صارفین کی سہولت اور سسٹم کی حفاظت کیلئے کیا گیا ہے۔

یہ بھی پڑھیں:کراچی سمیت ملک بھر میں سردی کی شدت بڑھ گئی، پارہ سنگل ڈیجیٹ میں پہنچ گیا

صنعتوں کے مالکان اور انتظامیہ سے توقع کی جا رہی ہے کہ وہ متبادل انتظامات کریں تاکہ پیداواری عمل متاثر نہ ہو۔ شہریوں اور صنعتکاروں کو بھی ہدایت کی گئی ہے کہ وہ گیس کے محدود وسائل کو بہتر طریقے سے استعمال کریں اور غیر ضروری کھپت سے گریز کریں۔

خیال رہے کہ یہ اقدام ملک بھر میں بڑھتی ہوئی سردی کے دوران توانائی کے مؤثر انتظام کیلئے اٹھایا گیا ہے تاکہ گھریلو صارفین کو درجہ حرارت میں کمی کے باوجود ضروری سہولیات فراہم کی جا سکیں۔