مراسلہ تمام کمشنرز، ڈپٹی کمشنرز، آر پی اوز، سی پی اوز اور ڈی پی اوز کو ارسال کیا گیا، جس میں غیر قانونی پتنگ بازی کیخلاف بلا امتیاز کارروائی کی واضح ہدایات دی گئی ہیں۔

محکمہ داخلہ کے مطابق صوبہ بھر میں کائٹ فلائنگ ریگولیشنز بل 2025 کے تحت پتنگ سازی، پتنگ فروخت اور پتنگ بازی پر مکمل پابندی عائد ہے۔

حکومت پنجاب نے بعض علاقوں میں غیر قانونی پتنگ بازی کے بڑھتے ہوئے واقعات پر شدید تشویش کا اظہار کیا، مراسلے میں واضح کیا گیا کہ صوبائی کابینہ نے قانون کے مطابق صرف 6، 7 اور 8 فروری کو لاہور میں محدود پیمانے پر بسنت منانے کی اجازت دی ہے، تاہم مقررہ تاریخوں اور اجازت کے بغیر کسی بھی مقام پر پتنگ سازی یا پتنگ بازی غیر قانونی تصور ہوگی۔

مراسلے میں کہا گیا کہ غیر قانونی پتنگ بازی انسانی جانوں اور عوامی تحفظ کیلئے سنگین خطرہ بن چکی ہے۔ پتنگ بازی کے دوران دھاتی، تندی اور مانجھا لگی ڈور کے باعث راہگیروں اور موٹر سائیکل سواروں کے زخمی ہونے کے متعدد واقعات رپورٹ ہو چکے ہیں، جو انتہائی تشویشناک ہیں۔

محکمہ داخلہ نے واضح کیا کہ انسانی جانوں کا تحفظ حکومت پنجاب کی اولین ترجیح ہے اور کسی صورت ایسے عمل کی اجازت نہیں دی جا سکتی جو شہریوں کی زندگیوں کیلئے خطرہ بنے۔

یہ بھی پڑھیں: دفعہ 144 کے تحت ڈبل سواری پر پابندی عائد

محکمہ داخلہ کے مطابق جشنِ بہاراں کے موقع پر ثقافتی سرگرمی کے طور پر صرف محفوظ بسنت کی اجازت دی گئی ہے، تاہم اس دوران بھی دھاتی ڈور، تندی یا کسی بھی قسم کی خطرناک ڈور کے استعمال پر مکمل پابندی برقرار رہے گی، خلاف ورزی کی صورت میں سخت قانونی کارروائی عمل میں لائی جائے گی۔

مراسلے میں مزید کہا گیا کہ بغیر اجازت پتنگ بازی یا فروخت میں ملوث افراد کو بھاری جرمانے اور طویل قید کی سزا دی جائے گی، پتنگ بنانے والوں، سامان فراہم کرنے والوں اور پتنگ بازی میں ملوث تمام افراد کی گرفتاری یقینی بنائی جائے۔

تمام کارروائیاں کائٹ فلائنگ ریگولیشنز بل 2025 کے مطابق کی جائیں گی اور تمام اضلاع اپنی کارروائیوں کی رپورٹ محکمہ داخلہ پنجاب کو ارسال کرنے کے پابند ہوں گے۔