ترجمان موٹروے کا کہنا ہے کہ ہلاک شدگان اور زخمیوں کو ٹی ایچ کیو ہسپتال منتقل کیا گیا، حادثے کی شکار ایمبولینس ایک میت لے کر کراچی سے مظفر گڑھ جا رہی تھی، دھند کے باعث لگائے گئے ڈائیورژن پر تیز رفتاری کے دوران حادثہ پیش آیا۔

یہ بھی پڑھیں:اسلام آباد کی اہم سڑکیں چھ گھنٹے کے لیے بند

ترجمان موٹر وے سینٹرل ریجن موٹر وے ایم 2 لاہور سے ہرن مینار تک، موٹر وے ایم 3 لاہور سے درخانہ تک، لاہور سیالکوٹ موٹر وے ایم 11، موٹر وے ایم 4 فیصل آباد سے ملتان تک، موٹر وے ایم 5 ملتان سے ظاہر پیر تک شدید دھند کے باعث بند ہیں، موٹر وے ایم 5 گڈو سے روہڑی تک بھی بند کر دی گئی ہے۔

ترجمان کا کہنا ہے کہ موٹر ویز کی بندش کا مقصد عوام کی جان و مال کا تحفظ ہے، ترجمان نے خبردار کیا کہ دھند میں لین کی خلاف ورزی خطرناک حادثات کا باعث ہو سکتی ہے۔

ترجمان کے مطابق قومی شاہراہ پر سندر، مانگا منڈی، پھول نگر، پتوکی، اوکاڑہ، گیمبر، ساہیوال، چیچہ وطنی اور اقبال نگر میں دھند چھائی ہوئی ہے، قومی شاہراہ پر حد نگاہ صفر سے 100 میٹر تک ہے، اس لیے شہری دن کے اوقات میں سفر کو ترجیح دیں۔

دھند میں محفوظ سفری وقت صبح 10 تا شام 6 بجے تک ہے، ڈرائیور حضرات فوگ لائٹس لازمی استعمال کریں، غیر ضروری سفر سے اجتناب کریں، اور تیز رفتاری نہ کریں، آگے والی گاڑی سے محفوظ فاصلہ رکھیں۔