پی ڈی ایم اے خیبرپختونخوا نے موسمی صورتحال کے پیشِ نظر تمام متعلقہ ضلعی انتظامیہ اور متعلقہ اداروں کو پیشگی اقدامات کے لیے الرٹ جاری کردیا۔

ترجمان پی ڈی ایم اے خیبرپختونخوا نے کہا کہ چترال، دیر، سوات، شانگلہ، کوہستان، کولائی پالس، مالاکنڈ، بونیر، مانسہرہ، بٹگرام، طورغر، ایبٹ آباد، ہری پور، کرم، خیبر، باجوڑ اور مہمند میں 20 سے 22 دسمبرتک گرج چمک کے ساتھ بارش کا امکان ہے۔

ان کا کہنا تھا کہ اس دوران صوابی، مردان، نوشہرہ، پشاور، چارسدہ، کوہاٹ، ہنگو، اورکزئی، کرک، بنوں، لکی مروت، ٹانک، ڈی آئی خان اور شمالی و جنوبی وزیرستان میں بھی بارش جبکہ پہاڑوں پر برفباری متوقع ہے۔

پی ڈی ایم اے کا کہنا ہے کہ برفباری کے باعث ناران، کاغان، دیر، سوات، مالاکنڈ، کوہستان، مانسہرہ، ایبٹ آباد، شانگلہ اور گلیات میں سڑکیں بند یا پھسلن کا شکار ہوسکتی ہیں، پہاڑی علاقوں میں لینڈ سلائیڈنگ اور برفانی تودے گرنے کا خطرہ ہے۔

یہ بھی پڑھیں: شدید دھند کا راج، موٹروے ایم 3، ایم 4 اور ایم 5 بند

حکام کے مطابق موسمی صورتحال کے پیش نظر متعلقہ اداروں کو نکاسی آب کے نظام کو فعال رکھنے اور بل بورڈز کو محفوظ بنانے کی ہدایات جاری کردی گئی ہیں،دریاؤں، ندی نالوں اور برساتی نالوں کی مسلسل مانیٹرنگ کی بھی ہدایت کی گئی ہے۔

پی ڈی ایم اے نے شہریوں سے اپیل کی کہ سیاح اور مسافر دورانِ برفباری کافی مقدار میں پانی، خوراک، ادویات اور گرم کپڑے ساتھ رکھیں، عوام تیز ہوا یا گرج چمک کے دوران بجلی کے کھمبوں، اشتہاری بورڈز اور کمزور ڈھانچوں سے دور رہیں۔

حکام کے مطابق پی ڈی ایم اے کا پراونشل ایمرجنسی آپریشن سنٹر 24 گھنٹے فعال ہے، عوام کسی بھی اطلاع کے لیے ٹال فری ہیلپ لائن 1700 پر رابطہ کریں۔