ترجمان موٹروے پولیس سید عمران احمد نے بتایا کہ موٹروے ایم کو 4 باہو انٹرچینج سے گوجرہ انٹرچینج اور باہو انٹرچینج سے ملتان انٹرچینج تک دھند کی وجہ سے ٹریفک کے لیے بند کر دیا گیا ہے، موٹروے ایم 3 بھی درخانہ سے رجانہ تک دھند کی وجہ سے عام ٹریفک کے لیے بند کردی گئی۔

ان کا کہنا تھا کہ موٹروے ایم 5 بھی ملتان سے ظاہر پیر تک دھند کی وجہ سے بند ہے، قومی شاہراہ پر کسووال، اقبال نگر ، چیچہ وطنی اور میاں چنوں میں شدید دھند ہے، خانیوال، ملتان، بستی ملوک ، لودھراں اور بہاولپور میں دھند کے باعث قومی شاہراہ پر حد نگاہ صفر سے 100 میٹر تک ہے۔

یہ بھی پڑھیں: لاہور میں شدید دھند، حدِ نگاہ متاثر، متعدد موٹرویز بند

ترجمان نے کہا کہ موٹرویز کی بندش کا مقصد عوام کی جان و مال کا تحفظ ہے،دھند میں لین لائن کی خلاف ورزی خطرناک حادثات کا باعث بن سکتی ہے، روڈ یوزرز لین ڈسپلن پر سختی سے عمل کریں، شہری دن کے اوقات میں سفر کو ترجیح دیں۔

موٹروے پولیس ترجمان کا کہنا تھا کہ دھند میں صبح 10 تا شام 6 تک محفوظ سفری اوقات ہیں، ڈرائیور حضرات فوگ لائٹس کا لازمی استعمال کریں، غیر ضروری سفر سے اجتناب کریں، تیز رفتاری نہ کریں، آگے والی گاڑی سے محفوظ فاصلہ رکھیں، کسی بھی رہنمائی اور مدد کے لیے موٹروے پولیس کی ہیلپ لائن 130 پر رابطہ کریں۔