صوبائی وزیرِ تعلیم رانا سکندر حیات کی جانب سے سماجی رابطے کی ویب سائٹ ایکس (سابقہ ٹوئٹر) پر جاری کیے گئے بیان میں کہا گیا ہے کہ پنجاب کے تمام سکول 22 دسمبر 2025 سے 10 جنوری 2026 تک موسمِ سرما کی تعطیلات کے لیے بند رہیں گے۔ وزیر تعلیم کے مطابق یہ فیصلہ موسم کی شدت، ماہرین کی سفارشات اور والدین و اساتذہ کی مشاورت کے بعد کیا گیا ہے۔
یہ بھی پڑھیں: سویڈن کا پاکستانی طلبہ کے لیے اسکالرشپ کا آغاز
سرکاری اعلامیے میں کہا گیا ہے کہ تعطیلات کے دوران تمام سرکاری اور نجی تعلیمی ادارے، بشمول پرائمری، مڈل، ہائی اور ہائر سیکنڈری سکولز، تدریسی سرگرمیوں کے لیے بند رہیں گے۔ تعطیلات کے حوالے سے نوٹیفکیشن متعلقہ ڈسٹرکٹ ایجوکیشن اتھارٹیز کو بھی بھیج دیا گیا ہے تاکہ وہ اس پر عملدرآمد یقینی بنا سکیں۔
Important=
— Rana Sikandar Hayat (@RanaSikandarH) December 4, 2025
winter vacations from 22nd December to 10th January
واضح رہے کہ ہر سال دسمبر میں صوبہ پنجاب کے مختلف اضلاع میں شدید سردی، دھند اور اسموگ کے باعث معمولاتِ زندگی متاثر ہوتے ہیں۔ اسی تناظر میں صوبائی حکومت سکولوں کی تعطیلات کا اعلان کرتی ہے تاکہ بچوں کو سردی کے اثرات اور صحت کے مسائل سے بچایا جا سکے۔ رپورٹ کے مطابق رواں سال پنجاب کے کئی اضلاع میں شدید دھند اور کم درجہ حرارت نے صورتحال کو مزید گھمبیر بنا دیا تھا، جس کے بعد والدین، اساتذہ اور ماہرینِ صحت نے حکومت کو بروقت تعطیلات کے اعلان کی سفارش کی۔
وزیر تعلیم رانا سکندر حیات نے اپنی پوسٹ میں مزید کہا کہ بچوں کی صحت پہلی ترجیح ہے اور موسم کی شدت کے پیشِ نظر سکولوں کی بروقت بندش ضروری تھی۔ انہوں نے والدین سے درخواست کی کہ وہ بچوں کو سخت سردی سے بچانے کے لیے احتیاطی تدابیر اختیار کریں اور تعطیلات کو مثبت سرگرمیوں کے ذریعے مفید بنائیں۔
